نجم الدین اربکان

نجم الدین اربکان
(ترکی میں: Necmettin Erbakan)
معلومات شخصیت
پیدائش	29 اکتوبر 1926ء   سینوپ، ترکی
وفات	27 فروری 2011ء (85 سال)  انقرہ
وجہ وفات	عَجزِ قلب
شہریت	ترکیہ
جماعت	رفاہ پارٹی (1987–1998) ملی سلامتی پارٹی (1973–1981) فضیلت پارٹی (1999–2003) سعادت پارٹی (2003–2011)
مناصب
وزیر اعظم ترکی
برسر عہدہ 28 جون 1996  – 30 جون 1997
عملی زندگی
مادر علمی	استنبول ٹیکنیکل یونیورسٹی جامعہ لندن شاہ سعود یونیورسٹی
پیشہ	سیاست دان ،  انجینئر ،  استاد جامعہ
پیشہ ورانہ زبان	ترکی
ملازمت	استنبول ٹیکنیکل یونیورسٹی
الزام و سزا
جرم	بدعنوانی
دستخط

اتحاد بین المسلمین کے داعی اور سابق ترک وزیر اعظم نجم الدین اربکان 29 اکتوبر1926 کو شمالی ترکی کے سینوپ نامی علاقے میں پیدا ہوئے جو بحرہ اسود کے ساحل پر واقع ہے۔ آپ کے والد کا نام محمد صابری تھا۔۔ آپ ان کی دوسری بیوی کے بطن سے تھے۔

تعلیمی پس منظر

ثانوی تعلیم مکمل کرنے کے بعد آپ نے استنبول ٹیکنیکل یونیورسٹی سے میکینیکل انجینئری میں ڈگری حاصل کی۔ بعد ازاں آپ نے جرمنی کی ایک معروف جامعہ میں داخلہ لیا اور یہاں سے پی ایچ ڈی کی سند حاصل کی۔ آپ کے تفصیلی مقالے کا موضوع ڈیزل انجن تھا۔ جرمنی میں آپ نے مشہور زمانہ جرمن ٹینک لیپرڈ اے ون کی ڈیزائننگ ٹیم کے چیف انجینئر کی حیثیت سے اپنی صلاحیتوں کا لوہا منوایا۔ ترکی واپسی پر آپ استنبول ٹیکنیکل یونی ورسٹی میں لیکچرار مقرر ہوئے جہاں آپ کو 1965 میں پروفیسر کے عہدے پر تعینات کیا گیا۔ ان اہم ذمہ داریوں کو بخوبی انجام دینے کے بعد آپ نے ملکی سیاست میں حصہ لینے کا قصد کیا۔

میدان سیاست میں

1969 سے اربکان نے سیاست میں عملی حصہ لینا شروع کیا۔ آپ نے اپنی پہلی سیاسی جماعت نیشنل وائس پارٹی تشکیل دی جو اسلامی طرزسیاست کی حامل تھی۔ سیکولر تنگ نظر حکومت نے اس پر 1971 میں پابندی عائد کردی۔ آپ نے 1972 میں نیشنل سالویشن پارٹی قائم کی اور 1973 کے انتخابات میں حصہ لے کر 48 نشستیں حاصل کرکے سیکولرپسندوں کی نیندیں اڑادیں۔1974 میں آپ نائب وزیر اعظم بھی منتخب ہوئے۔ 1977 کے انتخابات میں آپ کی جماعت نیشنل سالویشن پارٹی ملک کی تیسری بڑی طاقت بن کر ابھری۔ مگر تین سال بعد ہی ترک فوج کے سیکولر پسندوں نے آپ کی جماعت کو کالعدم قرار دے کر آپ کو پابند سلاسل کر دیا۔ یہ ظالمانہ پابندی 1987 تک رہی جو ایک ریفرنڈم کے نتیجے میں ختم ہوئی۔ آپ نے رفاء پارٹی تخلیق کی اور 1990 کے انتخابات میں 40 نشستیں حاصل کیں۔ یہی وہ انتخابات تھے جس کے بعد ترک سیاست میں اسلامی عنصر کو ایک اہم رکن شمار کیا جانے لگا۔

وزارت عظمی

1995 میں ہونے والے انتخابات میں رفاء پارٹی نے ملک کے 21 فیصد ووٹ حاصل کرلیے اور ایک دوسری جماعت کے ساتھ شراکت میں حکومت قائم کرلی۔ ترکی کے ایوان نمائندگان نے آپ کو اپنا قائد ایوان منتخب کر لیا۔ عدنان یندریس شہید کے بعد ترکی کے ایوان اقتدار میں پہلا اسلام پسند مرد جری داخل ہوا . آپ نے ترک عوام کو معیار زندگی بلند کرنے کی خاطر اہم کثیر الجہتی اقدامات کیے۔ آپ کی معتدل مزاجی اور فراست کا کرشمہ یہ ہے کہ آپ نے ترک سیاست کا محور سیکولرازم سے اسلام میں تبدیل کر دیا۔

خارجہ پالیسی

بحثیت وزیر اعظم آپ کی خارجہ پالیسی دو مرکزی نکات پر مشتمل تھی۔ اور یہ کہ آپ اسلامی ممالک کے ساتھ قریبی تعلقات کو نہایت اہمیت دیتے تھے اس ضمن مین آپ نے ڈی ایٹ نامی تنظیم قائم کی جو اسلامی ممالک کے معاشی مسائل کے حل کے لیے کوشاں ہے۔ دوم یہ کہ آپ صیہونیت کے سخت ناقد تھے اور اس کے اسلامی ممالک میں بڑھتی ہوئی ریشہ دوانیوں کے سدباب کس لیے ٹھوس اقدامات کرنے کے متمنی تھے۔

معزولی

ترک فوج کے سیکولر پسندوں کو آپ کی بلکہ دوسرے الفاظ میں اسلامی طرز حکمرانی کی تیزی سے بڑھتی ہوئی مقبولیت کہاں گوارا ہو سکتی تھی۔ انھوں نے صرف ایک سال بعد ہی اپنے خبث باطن کامظاہرہ کرتے ہوئے آپ کی حکومت ختم کردی۔ اس بار آپ کے عملی سیاست میں حصہ لینے پر بھی پابندی عائد کردی گئی۔

دوبارہ صف بندی

اربکان کی سوچ کوشکست دینا ناممکنات میں سے تھا۔ آپ نے ساتھیوں نے باطل کے آگے ہتھیار ڈالنا تو سیکھا ہی نہ تھا۔1997 میں آپ نے ورچو پارٹی قائم کرکے سیکولرپرستوں کوایک بار پھر چیلنج کر دیا۔حسب سابق ورچو پارٹی بھی 2001 میں سیکولراستداد کی تنگ نظری کا شکار ہو گئی۔ اب اربکان نے سعادت پارٹی کی شکل میں سیکولرازم کے سامنے چٹان کھڑی کردی۔ ترکی کے موجودہ صدر اور سابق وزیر خارجہ عبد اللہ گل آپ کی حکومت میں وزیر رہے۔ موجودہ وزیر اعظم رجب طیب اردگان آپ کی رفاء پارٹی کے ٹکٹ پر ہی استنبول کے میئر رہ چکے ہیں۔ بلاشبہ یہ کہا جا سکتا ہے کہ آج کی موجودہ ترک حکومت نے اربکان کی رفاہ پارٹی سے جنم لیا ہے۔

وفات

عالم اسلام کا یہ قابل فخر سرمایہ 27 فروری 2011 کو انقرہ کے ایک ہسپتال میں حرکت قلب بند ہوجانے کے باعث داعی اجل کو خیرباد کہہ کر اپنے رب کے حضور حاضر ہو گیا۔ آپ کی وفات سے نا صرف ترکی بلکہ سارا عالم اسلام اپنے ایک عظیم ترین رہنما سے محروم ہو گیا۔

سیاسی زندگی پر ایک نظر

اربکان نے اپنی سیاسی زندگی میں کبھی تصادم کی راہ اختیار نہیں کی۔ ان کو یکے بادیگرے 5 بار پابندی کا سامنا کرنا پڑا۔ سیکولرازم کی محافظ فوج اور عدلیہ نے ہمیشہ اربکان کی راہ میں روڑے اٹکائے ترک عوام میں اربکان کے سیاسی مقبولیت کا یہ عالم تھا کہ اربکان نے جب بھی بکھرے تنکوں سے شیرازہ بندی کی تو عوام نے ہر بار پہلے سے بھی زیادہ جوش خروش سے اربکان کی پزیرائی کی۔ اربکان نے کبھی عوام کو خالی خولی کھوکھلے نعروں سے نہیں بہلایا۔ سیکولر ازم کی مسلسل مخالفت کے باوجود آپ نے کبھی خودساختہ جلاوطنی کا عذرلنگ لے کر ترکی سے فرار ہونے کی کوشش نہیں کی۔ بین الاقوامی گریٹ گیم کا حصہ بن کر اقتدار کی سیڑھیاں چڑھنے سے ہمیشہ اجتناب کیا۔ پارٹی کو پرائیوٹ لمیٹیڈ بنانے، ریموٹ کنڑول سے چلانے جیسے داغوں سے اپنا دامن ہمیشہ محفوظ رکھا۔ آپ نے کبھی ایوان اقتدارمیں براجمان مخالفین کو بزور قوت نکالنے کی بات نہیں کی۔ نظام سے بغاوت، سول نافرمانی جیسی بیساکھیوں پر کھڑے ہونے کی کبھی کوشش نہیں کی۔ لوٹا کریسی،ہارس ٹریڈنگ، دھونس دھاندلی جیسے الفاظ سے اپنی لغت کو آلودہ نہیں کیا۔ اربکان نے کبھی اپنے عوام کو اپنی فوج سے لڑانے کی راہ اختیار نہیں کی۔ آپ نے ہر حکومت وقت کے ہر مظالم کا جواب نہایت تحمل مزاجی اور دانشمندی سے دیا۔ دوراندیشی سے عوام کی سوچیں بدلیں۔ ان کو اسلام کی حقیقت سے روشناس کرایا۔ مستقل مزاجی، سخت محنت، مقصد کی جانب سفر اربکان کی سیاست کے اہم استعارے تھے۔ انھی کوششوں کا ثمر ہے کہ آج اتاترک کے جدید ترکی میں سیکولرازم لرزہ براندام ہے۔ اسلامی راسخ العقیدہ سیاسی عنصر اس حد تک طاقتور ہو چکا ہے کہ اس کو شکست دینے میں ترک فوج کے بھی پر جلتے نظر آتے ہیں۔ 1997 میں اربکان کی حکومت پر شبخون مارنے والے تمام افسران آج عدالتی کٹہروں میں کھڑے ہیں۔ ترک فوج کے بے شمار اعلیٰ افسران نے آپ کے سفرآخرت میں شرکت کی۔ چشم فلک نے یہ بھی منظر دیکھا کہ آپ کی سیاست کی سب سے بڑی مخالف ترک فوج کا سربراہ آپ کو سلام پیش کر رہا تھا۔ اسی اربکان کے شاگردوں عبد اللہ گل اور رجب طیب اردگان نے آج سیکولرازم کو ایسی نکیل ڈالی ہے کہ ماضی میں ترک حکومتوں کو کنٹرول کرنے والی سیکولر فوج اور عدلیہ آج ترک حکومت کے کنٹرول میں ہیں۔ یہ کنٹرول اسلام پسندوں نے قوت سے نہیں بلکہ عوام کے ووٹ کی طاقت سے حاصل کیا ہے۔ ہندستان میں آپ ہی کے نقش قدم پر چل کر اسٹوڈنٹ اسلامک آرگنائیزیشن (SIO(STUDENTS ISLAMIC ORGANIZATION اپنے فرائض کو انجام دے رہی ہے جس میں بہت قابل شخصیات موجود ہیں نہاس مالا،توصیف احمد مدککری، صارم قمر ضمان سر فہرست ہیں۔