فخر الدین گیاوی

ابو الحیا، مولانا، قاری محمد فخر الدین فخر ؔ گیاوی
مدرسہ قاسمیہ اسلامیہ، گیا کے مہتمم
برسر منصب 1941ء تا 1988ء
پیشرو	محمد خیر الدین گیاوی
جانشین	معین الدین قاسمی گیاوی
ذاتی
پیدائش	محمد فخر الدین 1913ء محلہ باٹم برج، مولانا عبد الغفار لائن، گیا، صوبہ بہار اڑیسہ، برطانوی ہند
وفات	9 فروری 1988(1988-20-09) (عمر  74–75 سال) گیا، بہار، بھارت
مذہب	اسلام
فقہی مسلک	حنفی
اساتذہ	حسین احمد مدنی مرتضی حسن چاند پوری محمد میاں دیوبندی محمد اعزاز علی امروہوی اصغر حسین دیوبندی محمد شفیع دیوبندی عبد المالک صدیقی

محمد فخر الدین فخر گیاوی (1913 – 1988ء) ایک ہندوستانی دیوبندی عالم، نعت گو شاعر، استاذ اور مصنف تھے۔ انھوں نے تقریباً پچاس سال تدریسی و دینی خدمات انجام دی ہیں۔

ابتدائی و تعلیمی زندگی

محمد فخر الدین فخر گیاوی کی ولادت 1331ھ (مطابق 1913ء) کو محلہ باٹم برج، مولانا عبد الغفار لائن، گیا، صوبہ بہار اڑیسہ (موجودہ صوبہ بہار) میں ان کے نانا عبد الغفار سرحدی گیاوی کے مکان میں ہوئی تھی۔

حفظ کے بعد فارسی میں گلستانِ سعدی تک کی کتابیں گھر پر اپنے والد محمد خیر الدین گیاوی ہی سے پڑھیں، پھر مدرسہ فرقانیہ لکھنؤ جاکر ایک سال قاری عبد المالک صدیقی سے روایتِ حفص عن عاصم میں تجوید و قراءت کی تعلیم حاصل کی اور وہیں پر درس نظامی کی شرح ماۃ عامل تک کی کتابیں بھی پڑھیں۔ پھر گھر آکر اپنے والد سے ہی ہدایۃ النحو وغیرہ کتابیں پڑھیں، پھر قاری عبد المالک کے پاس (جو اس وقت مدرسہ فرقانیہ لکھنؤ سے مدرسہ فرقانیہ ٹونک منتقل ہو گئے تھے) ٹونک، راجستھان گئے اور وہیں پر مزید مشقِ قرات کی اور شرحِ جامی تک کی کتابیں بھی پڑھیں۔ پھر گھر آکر اپنے والد سے تیسری بار شرح جامی، دوسری بار قدوری، سراجی اور شرح تہذیب پڑھی۔ پھر دوبارہ لکھنؤ جاکر دو سال میں قراءاتِ سبعہ کی تکمیل کی، لکھنؤ سے واپسی پر والد سے عربی پڑھنا شروع کیا، پر والد کی ناسازی طبیعت کی بنا پر یہ سلسلہ جاری نہ رہ سکا، پھر مدرسہ حمیدیہ قلعہ گھاٹ، دربھنگہ میں چند دنوں رہ کر مدرسہ مظاہر علوم سہارنپور چلے گئے اور ایک سال وہاں رہ کر صدیق احمد کشمیری، عبد الشکور کامل پوری اور جمیل احمد تھانوی جیسے اساتذہ سے فیض یاب ہوئے۔

شوال 1352ھ (مطابق 1934ء) میں دار العلوم دیوبند میں داخلہ لیا اور پانچ سال دار العلوم میں تعلیم حاصل کرنے کے بعد شعبان 1357ھ (1938ء) میں وہاں سے فراغت حاصل کی۔ ان کے دار العلوم دیوبند کے اساتذہ میں حسین احمد مدنی، محمد اعزاز علی امروہوی، محمد ابراہیم بلیاوی، اصغر حسین دیوبندی، محمد شفیع دیوبندی، ظہور احمد دیوبندی، عبد السمیع دیوبندی، ریاض الدین بجنوری، محمد جلیل علوی کیرانوی، عبد الحق نافع گل پشاوری اور شمس الحق سرحدی شامل تھے۔ ان کے اساتذۂ تجوید و قرات میں قاری عبد المالک صدیقی کے علاوہ مولانا ارادت الحق، قاری عبد القدوس اور حافظ فرید الدین شامل ہیں۔

بزم سجاد، دار العلوم دیوبند میں ان کی خدمات

’’انجمن اصلاح البیان ‘‘ (موجودہ نام: بزمِ سجاد) کی طرف سے موصوف کے دار العلوم میں داخلہ ہونے اور اس بزم سے منسلک ہونے تک کوئی تحریری شمارہ شائع نہیں ہوا تھا، باذوق طلبہ انفرادی طور پر تحریری مشق کیا کرتے، فخر گیاوی نے بزم سے کسی تحریری شمارہ کی اشاعت کی کمی کو دیکھتے ہوئے اس کمی کے ازالے اور طلبہ میں تحریری ذوق پیدا کرنے کے لیے اگلے ہی سال ’’البیان‘‘ کے نام سے ایک ماہنامہ کا اجرا کیا اور جمادی الاولی 1353ھ میں اس کا پہلا شمارہ اپنی ادارت میں شائع کیا اور چار سال اس کے مدیر رہے، فخر گیاوی کو اس مقصد میں خاصی حد تک کامیابی بھی ملی، طلبہ کی ایک بڑی تعداد اس تحریک میں شامل ہو گئی۔

جن لوگوں نے اس تحریک سے متاثر ہو کر فن تحریر میں ایک خاص کمال پیدا کیا، ان میں سلیمان آسیؔ مظفر پوری، شمس الحق شمس ؔ مظفر پوری، صغیر احمد قاسمی، قمر ؔ بہاری، ازہر مونگیری، صداقت حسین چمپارنی، عبد الحنان گیاوی وغیرہ کے نام قابل ذکر ہیں۔

عملی زندگی

تدریسی و انتظامی زندگی

سہارنپور و دیوبند کے دور طالب علمی ہی میں فخر گیاوی ایک قاری قرآن کی حیثیت سے مشہور ہو چکے تھے۔ چناں چہ دار العلوم کی طالب علمی کے زمانے میں ہی ایک عالم محمود سورتی، مہتمم دار العلوم تاموے، کیمبل روڈ، رنگون نے اپنے مدرسے کی تدریس کے لیے انھیں دعوت دے دی، جس کی بنا پر فراغت کے بعد 1357ھ میں فخر گیاوی رنگون گئے اور ایک سال اس مدرسے میں استاذِ تجوید رہے۔

ایک سال دار العلوم تاموے میں مدرس رہنے کے بعد شوال 1358ھ (مطابق اواخرِ نومبر/اوائلِ دسمبر 1939ء) میں اپنے شیخ حسین احمد مدنی کی دعا اور محمد اعزاز علی امروہوی کے مشورے سے رنگون ہی میں جامعہ قاسمیہ کے نام سے ایک مدرسے کی بنیاد رکھی اور دو سال تک اس مدرسے کو پروان چڑھایا، چند دنوں میں وہاں شرح جامی تک کی تعلیم ہونے لگی؛ لیکن منشائے الٰہی سمجھیں کہ دوسری عالمی جنگ کے موقع پر جاپان کی رنگون پر بمباری سے قبل ہی اپنے والد اور شیخ کے حکم سے رنگون سے ہندوستان چل دیے اور ابھی کلکتہ ہی پہنچے تھے کہ رنگون پر بمباری کی خبر آ پہنچی۔

رنگون سے واپسی کے بعد اپنے شیخ حسین احمد مدنی کے مشورہ و دعا اور اپنے والد کے حکم سے مدرسہ قاسمیہ اسلامیہ، گیا کے انتظام و اہتمام کی ذمے داری سنبھالی، ان کے دور اہتمام میں اس مدرسے نے خوب ترقی و شہرت حاصل کی، 1941ء سے اپنی وفات 1988ء تک تقریباً 47 سال اس ادارے کے مہتمم رہے، آج اس مدرسے کی تقریباً 100 شاخیں ہیں۔ یہ وہ ادارہ ہے، جو حسین احمد مدنی اور ان کے فرزندِ ارجمند سید اسعد مدنی کا منظورِ نظر تھا اور جہاں جمعیت علمائے ہند (الف) کے صدر سید ارشد مدنی اور جمعیت علمائے ہند (م) کے سابق صدر محمد عثمان منصور پوری بھی تدریسی خدمات انجام دے چکے ہیں۔

تلامذہ

ان کے مشہور تلامذہ میں محی الدین گیاوی (فرزندِ اکبر)، معین الدین قاسمی گیاوی (فرزندِ اصغر)، عبد الرحیم بانکوی، میکائیل بانکوی، سید شمیم الحق گیاوی، قسیم الحق گیاوی، محمد یعقوب فریدی، حسین احمد عارف گیاوی اور حافظ محمد محسن شامل تھے، جن کے علاوہ فخر گیاوی کے مشہور و غیر مشہور دیگر تلامذہ کی ایک کثیر تعداد ہے۔

بیعت و خلافت

وہ زمانۂ طالب علمی ہی میں بشارت کریم گڑھولوی (1877ء - 1935ء) کی طرف مائل اور ان کے معتقد تھے؛ لیکن ان کی تعلیم سے فراغت سے پہلے ہی گڑھولوی کا انتقال ہو گیا، پھر وہ حسین احمد مدنی سے بیعت ہوئے اور تصوف میں ان کے مجاز اور اجل خلفاء میں شمار ہوئے۔

شاعری

فخر گیاوی ایک کہنہ مشق، قادر الکلام اور فی البدیہ اشعار کہنے والے شاعر تھے۔ ان کے اندر بچپن ہی سے شاعری کا ذوق اور خداداد صلاحیت موجزن تھی، زمانۂ طالب علمی ہی میں شعر کہنا شروع کر دیا تھا۔ ابتدا میں تبسم ؔ تخلص کرتے تھے، پھر مستقل تخلص فخر ؔ اختیار کیا۔

وہ عربی، فارسی اور اردو؛ تینوں زبانوں میں شعر کہتے تھے، شاعری میں ان کے خاص استاذ رسا ؔ ہمدانی گیاوی (متوفی: 1948ء) تھے، انھوں نے بسمل ؔ سنسہاروی (متوفی: 1964ء) سے بھی مشورۂ سخن لیا، نیز دار العلوم دیوبند کے زمانۂ طالب علمی میں اردو فارسی شاعری میں ابو الوفا عارف ؔ شاہ جہاں پوری (متوفی: 1980ء) سے اور عربی شاعری میں محمد اعزاز علی امروہوی (متوفی: 1955ء) سے اصلاح لی۔

وفات اور پسماندگان

فخر گیاوی کا انتقال 2 جمادی الاخری 1408ھ مطابق 9 فروری 1988ء کو گیا میں ہوا۔ نمازِ جنازہ سید اسعد مدنی نے پڑھائی اور کریم گنج، گیا کے قبرستان میں سپردِ خاک ہوئے۔

پس ماندگان میں دو بیٹے تھے: ایک محی الدین گیاوی اور دوسرے معین الدین قاسمی گیاوی، سابق صدر جمعیت علمائے بہار (الف) و سابق مہتمم مدرسہ قاسمیہ اسلامیہ گیا (دونوں وفات پا چکے ہیں) اور دو بیٹیاں ہیں، جن میں سے ایک قاری محمد حسان مظاہری ثم مکی، خلیفہ و مجاز محمد زکریا کاندھلوی سے منسوب ہوئی تھیں اور دوسری؛ سید محمد سالم کٹکی کے نکاح میں آئی تھیں۔

تصانیف

فخر گیاوی کی مطبوعہ تصانیف کے نام مع مختصر تعارف ذیل میں مندرج ہیں:

• درس حیات: جس میں انھوں نے عبد الغفار سرحدی گیاوی، بشارت کریم گڑھولوی اور محمد خیر الدین گیاوی کی تفصیلی سوانح حیات جمع کی ہیں (طبع اول: 1972ء، مرتب: قسیم الحق گیاوی، طبع دوم: 2010ء، مرتب: محمد اعظم ندوی)۔
• نورِ ایماں: یہ فخر گیاوی کی حمدیہ، نعتیہ، اصلاحی اور اسلامی نظموں کا مجموعہ ہے، جو خاصا مقبول ہوا۔
• نوائے درد: یہ بشارت کریم گڑھولوی کی رحلت پر کہے گئے اشعار کا مجموعہ ہے۔
• نذرِ عقیدت: یہ ان کے پیر و مرشد حسین احمد مدنی کی شان میں کہے گئے اشعار کا مجموعہ ہے (تیسرا ایڈیشن: 1966ء، مرتب: قسیم الحق گیاوی)۔

مزید تذکرہ

• قاری ڈاکٹر فیوض الرحمن قادری (1983ء)۔ سوانح امام القراء حضرت قاری محمد عبد المالک رحمۃ اللّٰہ علیہ۔ اردو بازار، لاہور: پاکستان بک سنٹر۔ صفحہ: 16 
• عماد القراء جناب مرزا بسم اللہ بیگ (1970ء)۔ "قاری حافظ فخر الدین قاری عشرہ ناظم مدرسہ قاسمیہ گیا"۔ تذکرہ قاریان ہند (جلد سوم)۔ آرام باغ، کراچی: میر محمد کتب خانہ۔ صفحہ: 49-50 
• ابوالحسن اعظمی (1419ھ (1999ء))۔ "شیخ القراء حضرت قاری عبد المالک صاحب"۔ حسن المحاضرات فی رجال القراءات (جلد دوم)۔ دیوبند: مکتبہ صوت القرآن۔ صفحہ: 252