کتاب استثنا

آزاد دائرۃ المعارف، ویکیپیڈیا سے
:چھلانگ بطرف رہنمائی، تلاش

کتاب استثنا (عبرانی: דְּבָרִים‎، یونانی: Δευτερονόμιον) عبرانی بائبل کی چوتھی اور تورات کی پانچ کتابوں میں سے ایک ہے۔ تورات کی یہ پانچویں کتاب حضرت موسیٰ علیہ السلام کی آخری تصنیف ہے۔ آپ نے یہ کتاب غالباً 1400 قبل مسیح میں لکھی، جب بنی اسرائیل موآب کے میدانوں میں خیمہ زن تھے اور ملک موعود کنعان میں داخل ہونے کے منتظر تھے۔

اس کتاب میں حضرت موسیٰ علیہ االسلام کے آخری خطبات درج ہیں اور ساتھ ہی آپ کی زندگی کے آخری ایام کے واقعات اور آپ کی وفات کا ذکر بھی پایا جاتا ہے۔ بائبل کے عالم اس بات پر متفق ہیں کہ یہ آخری واقعات اور حضرت موسیٰ کی وفات کا بیان حضرت یشوع کی تالیف ہیں۔ حضرت موسی علیہ السلام نے 120 سال کی عمر میں وفات پائی۔ آپ نے حضرت یشوع کو اپنے انتقال سے پہلے اپنا جانشین مقرر کر دیا تھا اور یہ حضرت یشوع ہی تھے جن کی قیادت میں بنی اسرائیل کی نئی نسل ملک کنعان میں داخل ہوئی۔

کتاب مقدس کے عربی ترجمہ میں اس کتاب کا نام "تثنية" اور اُردوترجمہ میں "استثنا" رکھا گیا ہے۔ اس کی وجہ تسمیہ یہ ہے کہ اس میں حضرت موسیٰ نے اپنی پچھلی کتابوں میں مندرج شریعت کے احکام و قوانین کو اختصار سے دوسری بار تحریر فرمایا ہے۔ یہ احکام و وقوانین مجموعی طور پر وہی ہیں جو حضرت موسیٰ خدا کی ہدایت کے بموجب بنی اسرائیل کو اُن کی اڑتالیس سالہ صحرانوردی کے مختلف اوقات میں دیتے رہے تھے۔

کتاب استثنا کا مقصد یہ تھا کہ بنی اسرائیل کی نئی نسل جو حضرت یشوع کی قیادت میں کنعان کی موعود سرزمین پر قدم رکھنے والی تھی بخوبی جان لے کہ احکام خداوندی کو ماننے کے فوائد اور نہ ماننے کے نقصانات کیا ہیں۔ خداوند خدا کا بنی اسرائیل سے تقاضا تھا کہ اُس کی برگذیدہ قوم پاک زندگی بسر کرے اور خدا کی وفادار رہے تاکہ وہ زندہ رہے، برکت، صحت، خوشحالی اور کامیابی سے ہمکنار ہو۔ لیکن اگر وہ عہد شکنی کی مرتکب ہوگی اور راہ راست سے دور ہو جائے گی تو لعنت، بیماری، افلاس اور موت کا شکار ہو گی۔

شروع شروع میں یہودیوں کے ہاں یہ کتاب یعنی کتاب استثنا نہیں پائی جاتی تھی، حضرت موسیٰ علیہ السلام کے کوئی چھے سو سال بعد ایک جنگ کے زمانے میں ایک شخص ملک کے اس وقت کے یہودی بادشاہ کے پاس ایک کتاب لایا اور کہا یہ مجھے یہ کتاب ایک غار سے ملی ہے۔ معلوم نہیں کس کی ہے؟ مگر اس میں دینی احکام نظر آتے ہیں۔ بادشاہ نے اپنے زمانے کی ایک نبیہ عورت(یہودیوں کے ہاں عورتیں بھی نبی رہی ہیں یا کم از کم وہ اس کا دعویٰ کرتے ہیں) کے پاس بھیجا۔ اس نبیہ نے جس کا نام ہلدا (Hulda) بیان کیا جاتا ہے یہ کہلا بھیجا کہ یہ حضرت موسیٰ علیہ السلام ہی کی کتاب ہے۔ چنانچہ حضرت موسیٰ علیہ السلام کے چھ سوسال بعد اسے حضرت موسیٰ علیہ السلام کی طرف منسوب کیا جانے لگا۔

حوالہ جات[ترمیم]

  • تاریخ قرآن از ڈاکٹر محمد حمید اللہ
کتاب استثنا
پیشرو
گنتی
عبرانی بائبل جانشین
یوشع
عیسائی
عہدنامہ قدیم