مہر عبد الحق سومرہ

مہر عبد الحق سومرہ
معلومات شخصیت
پیدائش	1 جون 1915ء   ضلع لیہ ،  برطانوی پنجاب
وفات	23 فروری 1995ء (80 سال)  ملتان ،  پاکستان
شہریت	پاکستان
عملی زندگی
مادر علمی	اورینٹل کالج لاہور
تعلیمی اسناد	پی ایچ ڈی
ڈاکٹری مشیر	سید محمد عبداللہ
پیشہ	ماہرِ لسانیات ،  مورخ ،  ادبی نقاد ،  مترجم
پیشہ ورانہ زبان	سرائیکی ،  انگریزی ،  اردو
باب ادب

ڈاکٹر مہر عبد الحق سومرہ (پیدائش: یکم جون، 1915ء - وفات: 23 فروری، 1995ء) پاکستان سے تعلق رکھنے والے سرائیکی اور اردو کے ممتاز محقق، ماہرِ لسانیات، نقاد اور مترجم تھے جو اپنی کتابوں ملتانی زبان اور اس کا اردو سے تعلق اور قرآن پاک کا سرائیکی ترجمہ کی وجہ سے مشہور و معروف ہیں۔ اس کے علاوہ آپ کی مشہور تصنیف ہندو صنمیات ہے۔ یہ کتاب اردو زبان میں ہندومت کے دیوتاؤں کے تفصیلی تعارف پر مشتمل ہے۔

حالات زندگی

ڈاکٹر مہر عبد الحق سومرہ یکم جون، 1915ء کو لیہ، پنجاب، برطانوی ہندوستان میں پیدا ہوئے۔ ڈاکٹر مہر عبد الحق نے ایف اے ایس ای کالج بہاولپور، بی اے ایمرسن کالج ملتان اور 1950ء میں ایم اے (اردو) کی ڈگری حاصل کی۔ 1957ء میں پنجاب یونیورسٹی اورئنٹل کالج لاہور سے ڈاکٹر سید محمد عبداللہ کی نگرانی میں مُلتانی زبان اور اُس کا اُردو سے تعلق کے نام سے مقالہ لکھ کر پی ایچ ڈی کی ڈگری حاصل کی۔

ادبی خدمات

ان کی تصانیف میں سرائیکی لوک گیت، ملتانی زبان اور اس کا اردو سے تعلق، کونین دا والی، سرائیکی زبان دے قاعدے قانون، لغات فریدی، سرائیکی دیاں مزید لسانی تحقیقاں، فرد فرید اور تراجم میں جاوید نامہ اقبال، رباعیات عمر خیام، کلام خواجہ فرید، قصیدہ بردہ شریف اور سب سے بڑھ کر قرآن پاک کا سرائیکی ترجمہ شامل ہے۔ اس ترجمے پر 1981ء میں حکومت پاکستان نے انھیں خصوصی اعزاز سے نوازا تھا۔

اعزازات

حکومت پاکستان نے 14 اگست 1994ء میں ڈاکٹر مہر عبد الحق سومرہ کو ان کی ادبی خدمات کے اعتراف کے طور پر صدارتی اعزاز برائے حسن کارکردگی عطا کیا۔ 1969ء میں انھیں داؤد ادبی انعام اور 1987ء میں اکادمی ادبیات پاکستان نے خواجہ فرید ایوارڈ سے بھی نوازا گیا۔

تصانیف

1. قرآن پاک کا سرائیکی ترجمہ
2. سرائیکی لوک گیت(1964ء)
3. ملتانی زبان اور اس کا اردو سے تعلق (1967ء)
4. کونین دا والی
5. سرائیکی زبان دے قاعدے قانون
6. لغات فریدی (1984ء)
7. سرائیکی دیاں مزید لسانی تحقیقاں
8. فرد فرید
9. تھل
10. جاوید نامہ اقبال (ترجمہ)
11. رباعیات عمر خیام (ترجمہ)
12. کلام خواجہ فرید (ترجمہ)
13. قصیدہ بردہ شریف (ترجمہ)
14. (بہ زبان انگریزی) The Sumra
15. ہندو صنمیات

وفات

ڈاکٹر مہر عبد الحق سومرہ 23 فروری، 1995ء کو ملتان، پاکستان میں وفات پاگئے۔