رفیع الدین ہاشمی

رفیع الدین ہاشمی
معلومات شخصیت
پیدائش	9 فروری 1940ء   ضلع تلہ گنگ
تاریخ وفات	25 جنوری 2024ء (84 سال)
شہریت	پاکستان
عملی زندگی
مادر علمی	اورینٹل کالج لاہور جامعہ پنجاب
تعلیمی اسناد	ڈاکٹر آف فلاسفی
ڈاکٹری طلبہ	صابر کلوروی ،  ڈاکٹر خالد ندیم ،  ارشد محمود ناشاد
پیشہ	پروفیسر ،  محقق ،  سفرنامہ نگار ،  مصنف
پیشہ ورانہ زبان	اردو
شعبۂ عمل	اقبالیات ،  سفرنامہ ،  تحقیق
ملازمت	اورینٹل کالج لاہور
اعزازات
تمغائے امتیاز
باب ادب

رفیع الدین ہاشمی' (9 فروری 1940ء - 25 جنوری 2024ء) پاکستان کے نامور ماہرِ اقبالیات، محقق اور سفرنامہ نگار تھے۔ وہ اورینٹل کالج لاہور کے شعبہ اردو کے چیرمین اور جامعہ پنجاب کے شعبہ اقبالیات میں پروفیسر بھی رہے۔

ابتدائی زندگی اور تعلیم

ڈاکٹر رفیع الدین ہاشمی 9 فروری 1940ء کو مصریال، ضلع تلہ گنگ میں پیدا ہوئے۔ 1963ء میں نجی حیثیت میں بی اے کیا اور 1966ء میں اورینٹل کالج لاہور سے ایم اے اردو کا امتحان فرسٹ کلاس فرسٹ پوزیشن میں پاس کیا۔

کیرئیر

1969ء میں محکمہ تعلیم پنجاب سے وابستہ ہوئے اور مختلف کالجوں میں تدریسی خدمات انجام دینے کے بعد 1982ء میں اورینٹل کالج لاہور میں تعینات ہوئے اور وہیں سے بطور پروفیسر سبکدوش ہوئے۔ کچھ عرصہ صدر شعبہ اردو بھی رہے۔ 1981ء میں جامعہ پنجاب سے تصانیف اقبال کا تحقیقی اور توضیحی مطالعہ کے موضوع پر مقالہ لکھ کر پی ایچ ڈی کی سند حاصل کی۔ 2002ء میں شعبہ اردو اورینٹل کالج سے بازیافت کے نام سے ایک تحقیقی مجلہ بھی جاری کیا۔ ریٹائرمنٹ کے بعد 2006ء سے 2008ء تک ہائر ایجوکیشن کمیشن کے ممتاز پروفیسر بھی رہے۔ کئی ادبی، علمی و تحقیقی رسائل کے مدیر و معاون مدیر بھی رہے۔

ادبی کام

ڈاکٹر رفیع الدین ہاشمی نے اقبالیات اور اردو زبان و ادب پر درجنوں کتابیں تصنیف و تالیف کی ہیں جن میں اصنافِ ادب، خطوطِ اقبال، کتابیاتِ اقبال، تصانیفِ اقبال کا تحقیقی و توضیحی مطالعہ، جامعات میں اردو تحقیق، یاد نامہ لالہ صحرائی، اقبال کی طویل نظمیں: فکری و فنی مطالعہ، 1985ء کا اقبالیاتی ادب - ایک جائزہ، 1986ء کا اقبالیاتی ادب - ایک جائزہ، خطوطِ مودودی، اقبال: مسائل و مباحث، اقبالیات کے سو سال، تحقیقِ اقبالیات کے مآخذ، اقبالیات: تفہیم و تجزیہ، پوشیدہ تری خاک میں (سفرنامہ اندلس)، سورج کو ذرا دیکھ (سفرنامہ جاپان)، مکاتیب مشفق خواجہ، پاکستان میں اقبالیاتی ادب، علامہ اقبال: شخصیت و فن و دیگر شامل ہیں۔

ان کی علمی و ادبی خدمات کے اعتراف میں ڈاکٹر خالد ندیم کا مرتبہ اردو، فارسی، ترکی، انگریزی، فرانسیسی اور جرمن زبانوں کے مقالات پر مشتمل مجموعہ ارمغانِ رفیع الدین ہاشمی 2013ء میں شائع ہو چکا ہے۔ ڈاکٹر عبد العزیز ساحر (ڈاکٹر رفیع الدین ہاشمی: سوانح اور کتابیات2005ء)، ڈاکٹر ارشد محمود ناشاد (مکاتیبِ رشید حسن خاں بنام رفیع الدین ہاشمی2009ء، گیان نامے بنام ڈاکٹر رفیع الدین ہاشمی2013ء، مکاتیبِ آرزو بنام ڈاکٹر رفیع الدین ہاشمی2014ء)، ڈاکٹر ظفر حسین ظفر (مکاتیبِ رفیع الدین ہاشمی بنام عبد العزیز ساحر2014ء، تذکارِ رفیع2017ء)، ڈاکٹر زیب النسا (مکاتیبِ رفیع الدین ہاشمی بنام زیب النسا2023ء، مکاتیبِ رفیع الدین ہاشمی بنام مشاہیر2023ء)اور خالد ندیم (مکاتیبِ ابنِ فرید بنام رفیع الدین ہاشمی2010ء، اقبالیاتی مکاتیب2012ء) ان کی مراسلت پر مشتمل مجموعے شائع کر چکے ہیں۔

ڈاکٹر رفیع الدین ہاشمی پر کشمیر یونیورسٹی سری نگر سے ڈاکٹر ظہور احمد مخدومی [پروفیسر رفیع الدین ہاشمی: حیات اور ادبی خدمات] پی ایچ ڈی کی ہے، جو کتابی صورت میں ایم آر پبلی کیشنز دہلی سے 2013ء میں شائع ہوا؛ جب کہ ڈاکٹرہارون الرشید تبسم [ڈاکٹر رفیع الدین ہاشمی بحیثیت اقبال شناس، 2017ء] اور ڈاکٹر زیب النسا [ڈاکٹر رفیع الدین ہاشمی: شخصیت اور فن، 2024ء] کی تحقیقات بھی شائع ہو چکی ہیں ۔

وفات

ڈاکٹر رفیع الدین ہاشمی 84 برس کی عمر میں 25 جنوری 2024ء کو لاہور میں انتقال کرگئے، ان کی نماز جنازہ منصورہ، لاہور میں ادا کی گئی۔

اعزازات

ڈاکٹر رفیع الدین ہاشمی بابائے اردو ایوارڈ اور قومی صدارتی اقبال ایوارڈ حاصل ر چکے ہیں۔

• بابائے اردو ایوارڈ
• صدارتی اقبال ایوارڈ
• تمغا امتیاز (2015)