ابن ام مکتوم

آزاد دائرۃ المعارف، ویکیپیڈیا سے
:چھلانگ بطرف رہنمائی، تلاش

51 ھ، 636ء

معروف صحابی، مورخین نے ان کا نام عبداللہ اور عمر لکھا ہے۔ زیادہ تر اپنی کنیت ابن ام مکتوم سے متعارف ہیں۔ باپ کا نام قیس تھا۔ مادر زاد نابینا تھے۔ ابتدائے بعثت میں مکہ میں اسلام قبول کیا۔ ایک مرتبہ حضور صلی اللہ علیہ وسلم روسائے قریش کو تبلیغ فرما رہے تھے کہ ابن اُم مکتوم آگئے۔ وہ حضور سے کچھ عرض کرنا چاہتے تھے لیکن حضور قریش کو سمجھانے میں اتنا منہمک تھے کہ توجہ نہ دے سکے۔ اس پر سورہ عبس کی ابتدائی آیات نازل ہوئیں۔ ان آیات کے نزول کے بعد حضور صلی اللہ علیہ وسلم خاص طور پر ابنِ اُم مکتوم کا لحاظ فرماتے تھے۔ ہجرت کے بعد آپ بھی مدینہ منورہ چلے گئے۔ اور موذن کا عہدہ عطا ہوا۔ حضور صلی اللہ علیہ وسلم جب کبھی باہر تشریف لے جاتے تو اکثر امامت کا شرف ابنِ اُم مکتوم کو حاصل ہوتا۔ آپ قرآن مجید کے حافظ اور مدینہ منورہ میں لوگوں کو قرات سکھاتے تھے۔ آپ سے کئی احادیث منقول ہیں۔ واقدی کے قول کے مطابق مدینہ منورہ میں وفات پائی۔ لیکن زبیر بن بکار کی روایت ہے کہ جنگ قادسیہ میں شہید ہوئے۔