بلال ابن رباح

بلال ابن رباح (عربی: بلال بن رباحة الحبشي) المعروف بلال حبشی، رسول اللہ صلی اللہ علیہ و آلہ و سلم کے مشہور صحابی تھے۔ حبشی نسل کے غلام تھے۔ اسلام کے پہلے مُوّذن تھے۔ کفار عرب نے حضرت بلال کے اسلام لانے کے وجہ سے بہت سے ظلم ڈھائے۔ حضرت ابوبکر صدیق نے انھیں خرید کر آزاد کر دیا۔ رسول کریم صلی اللہ علیہ و آلہ و سلم کے ساتھ تمام غزوات میں شریک رہے۔ جنگ بدر میں آپ نے امیہ بن خلف کو قتل کیا۔ رسول کریم صلی اللہ علیہ و آلہ و سلم نے اذان کہنے کے لیے حضرت بلال کو مقرر فرمایا۔ سفر میں حضور صلی اللہ علیہ و آلہ و سلم کے کھانے پینے کا انتظام حضرت بلال کے سپرد ہوتا تھا۔ رسول اللہ صلی اللہ علیہ و آلہ و سلم کے بعد حضرت عمر کے اصرار پر صرف ایک دفعہ اذان کہی۔ کہا جاتا ہے کہ اس روز اذان میں جب رسول اللہ صلی اللہ علیہ و آلہ و سلم کا نام آیا تو غش کھا کر گر پڑے۔