عبد الحق اعظمی

آزاد دائرۃ المعارف، ویکیپیڈیا سے
Jump to navigation Jump to search

شیخ ثانی عبد الحق اعظمی (ولادت: 1928ء - وفات: 30 دسمبر 2016ء) دار العلوم دیوبند کے سابق شیخ الحدیث تھے۔ رجب المرجب دوشنبہ کے دن 1928ء کو جگدیش پور ضلع اعظم گڑھ میں پیدا ہوئے۔ عبد الحق اعظمی صاحب کی ابتدائی تعلیم گاؤں کے مکتب اور بیساں مکتب میں ہوئی۔ عربی درجات مدرسہ عربیہ بیت العلوم سرائے میر اعظم گڑھ میں پڑھے، پھر دار العلوم مئو میں داخل ہوکر ہفتم عربی تک تعلیم مکمل کی، 1948ء میں دار العلوم دیوبند کے دورۂ حدیث شریف میں داخل ہوکر حسین احمد مدنی، محمد ابراہیم بلیاوی اور شیخ الادب اعزاز علی وغیرہم سے خصوصی استفادہ کیا۔ علوم وفنون سے فراغت کے بعد مختلف مقامات پر تدریسی خدمات انجام دیتے رہے، خاص طور سے یوپی کے شہر بنارس میں سولہ سال کا طویل عرصہ گزارا۔ ضلع گریڈیہہ (جھارکھنڈ) اور دار العلوم مئو وغیرہ میں بھی چھوٹی بڑی کتابوں کا درس دینے کا موقع ملا۔

1982ء میں دار العلوم دیوبند کے ارباب شوری کی نظر انتخاب عبد الحق اعظمی پر پڑی اور وہ دار العلوم مئو سے دار العلوم دیوبند منتقل ہو گئے۔ ان کو حسین احمد مدنی کے انداز تدریس سے وافر حصہ ملا تھا۔ انہوں نے دار العلوم دیوبند میں پینتیس برس بخاری شریف کا درس دیا۔

29 دسمبر 2016ء کو پیٹ میں انفکشن کی شکایت ہوئی اور دیوبند میں واقع ڈی کے جین ہاسپٹل میں داخل ہوئے، جہاں دوسرے روز یعنی 30 دسمبر 2016ء کو عشا کی اذان کے بعد دل کا دورہ پڑنے سے انتقال ہوا۔ اس کے اگلے دن سنیچر 31 دسمبر 2016ء کو بعد نماز عصر نمازجنازہ ادا کی گئی اور قاسمی قبرستان میں مدفون ہوئے۔