یحییٰ بن یعمر

یحییٰ بن یعمر
معلومات شخصیت
تاریخ وفات	سنہ 746
عملی زندگی
پیشہ	ماہرِ لسانیات

یحییٰ بن یعمر ابو سلیمان لیثی بصری عدوانى قرآن پر سب سے پہلے نقطہ لگانے والی شخصیت کا اعزاز رکھتے ہیں۔(المتوفی 129ھ/ 746ء)
یحییٰ بن یعمر تابعی علما میں سے ایک ہیں حدیث فقہ اور لغات عرب کا گہرا علم رکھنے والے تھے نحو کا علم انہوں نے ابو الاسود الدولی سے حاصل کیا
عثمام، علی عمار ابو ذر اور ابو ہریرہ سے روایت کرتے تھے اور ان سے یحییٰ بن عقیل، عطا خراسانی قتادہ اور عکرمہ نے روایت کی۔
حجاج نے انہیں مرو کا قاضی بنایا عموما ایک گواہ اور قسم سے فیصلہ کر دیا کرتے تھے۔

نام ونسب

یحییٰ نام،ابوسلیمان کنیت،نسبی تعلق قبیلہ لیث سے تھا۔

فضل وکمال

قرآن، حدیث، فقہ زبان اورادب جملہ علوم کے جامع تھی۔

قرآن

قرآن کے ممتاز عالم تھے،علامہ ابن سعد انہیں علمائے قرآن میں لکھتے ہیں۔

حدیث

حافظ حدیث بھی تھے،حافظ ذہبی نے حفاظ تابعین کے دوسرے طبقہ میں ان کے حالات لکھے ہیں،صحابہ میں انہوں نے حضرت عثمانؓ،علیؓ،عمار بن یاسرؓ، ابوذر غفاریؓ ،ابوہریرہؓ،ابو موسیٰ اشعریؓ،ابو سعید خدریؓ،ابن عباسؓ،ابن عمرؓ،سلیمان بن ضردؓ اورعائشہ صدیقہؓ جیسے اکابر سے روایتیں کی ہیں۔ یحییٰ بن عقیل سلیمان تیمی،عبداللہ بن بریدہ ،قتادہ،عکرمہ،عطاء خراسانی رکین بن ربیع،عبداللہ بن کلب سدوسی ازرق بن قیس اوراسحٰق بن نوید وغیرہ ان کے زمرۂ تلامذہ میں تھے۔

فقہ

فقہ میں بھی انہیں پورا درک تھا،حافظ ذہبی انہیں فقیہ علماء میں لکھتے ہیں ان کے تفقہ کی ایک سند یہ ہے کہ وہ مرو کے قاضی تھے۔

زبان وادب

ان مذہبی علوم کے علاوہ زبان وادب میں بھی انہیں مہارت تھی،نحو اورعربی زبان کے فاضل تھے نحوانہوں نے اس کے موجد اول ابوالاسود دؤلی سے حاصل کی تھی۔

فصاحت وبلاغت

زبان پر عبور کے ساتھ وہ بڑے فصیح وبلیغ تھے،ان کا شمار ممتاز فصحاء میں تھا۔

قضاء ت میں سہولت

یحییٰ خراسان کے پایہ تخت مرو کے قاضی تھے،مرو میں باقاعدہ دارالقضاء تھا،لیکن حاجت مندوں کی آسانی کے لیے وہ چلتے پھرتے ،راستے گلی میں تنازعوں کا فیصلہ کردیتے تھے،یحییٰ بن موسیٰ بن یسار کا بیان ہے کہ میں نے یحییٰ بن یعمر کو بازاروں اورگلیوں میں فیصلہ کرتے ہوئے دیکھا،بسا اوقات وہ سواری پر چلتے ہوتے، اس حالت میں اگر دو فریق آجاتے تو سواری روک کر کھڑے کھڑے فیصلہ دے دیتے۔

ایک اہم کا رنامہ

ان کی زندگی کا سب سے اہم کارنامہ جو ابدالآباد تک قائم رہے گا،قرآن کو منقوط کرنا ہے،ابتدا میں قرآن پاک نقطوں سے خالی تھا،سب سے اول یحییٰ نے پڑھنے والوں کی آسانی کے لیے نقطے لگائے۔

اہل بیت نبوی سے عقیدت

اہل بیت نبوی کے ساتھ ان کو نہایت گہری عقیدت تھی اور وہ ان کو بلا تفریق سب پر فضیلت دیتے تھے،لیکن کسی کی تنقیص نہ کرتے،ایک مرتبہ حجاج نے ان سے کہا تمہارا خیال ہے کہ حسن وحسین رسول اللہ ﷺ کی ذریت میں تھے؟یا تو تم اس خیال سے باز آؤ یا اس کا ثبوت پیش کرو،انہوں نے قرآن کی یہ آیت پیش کرکے ومن ذریۃ داؤد وسلیمان وزکریا ویحییٰ وعیسیٰ ، کہا کہ عیسی ؑ اور ابراھیمؑ کے درمیان اس سے کہیں کم تعلق ہے،جتنا حسنؓ وحسینؓ اورمحمد ﷺ کے درمیان ہے،اس جواب میں یہ نکتہ ہے کہ جب عیسیٰ بعد زمانی کے باوجود صرف مادری تعلق سے ابراہیم کی ذریت میں ہوسکتے ہیں تو حسنؓ وحسینؓ کے جو خاص نواسے ہیں رسول اللہ ﷺ کی ذریت میں کیا شبہ، یہ جواب سن کر حجاج مطمئن ہوگیا۔

وفات

باختلاف روایت 119ھ یا 120ھ میں انتقال کیا۔