لکھنؤ

लखनऊ
اوپر سے گھڑی وار: بڑا امام باڑہ، چارباغ ریلوے اسٹیشن، رومی دروازہ، حضرت گنج، لا مارٹنیری اسکول، امبیڈکر میموریل پارک
عرفیت: نوابوں کا شہر ، بھارت کا سنہرا شہر قسطنطینیۂ مشرق، شیرازِ ہند
ملک	بھارت
ریاست	اتر پردیش
ضلع	لکھنؤ
حکومت
• قسم	میئر کونسل
• مجلس	لکھنؤ شرکہ بلدیہ
• میئر	سنیکتا بھاٹیہ (بی جے پی)
• کمیشنر لکھنؤ ڈویژن	انیل گارگ
• رکنِ پارلیمان	راجناتھ سنگھ (بی جے پی)
رقبہ
• میٹرو	2,528 کلومیٹر2 (976 میل مربع)
بلندی	123 میل (404 فٹ)
آبادی (2015)	2,901,475
• درجہ	11th
• میٹرو	4,588,455
نام آبادی	لکھنوی، لکھنویٹ
منطقۂ وقت	بھارتی معیاری وقت (UTC+5:30)
ڈاک اشاریہ رمز	2260xx / 2270xx
ٹیلیفون کوڈ	+91-522
گاڑی کی نمبر پلیٹ	UP 32
خام ملکی پیداوار	$22 بلین
جنسی تناسب	915 ♀/♂
ویب سائٹ	lucknow.nic.in

لکھنؤ (ہندی: लखनऊ‎) بھارت کی سب سے زیادہ آبادی والی ریاست اتر پردیش کا دار الحکومت اور اردو کا قدیم گہوارہ ہے نیز اسے مشرقی تہذیب و تمدن کی آماجگاہ بھی کہا جاتا ہے۔ اس شہر میں ضلع لکھنؤ اور لکھنؤ منڈل کا انتظامی صدر دفتر موجود ہے۔ لکھنؤ شہر اپنی نزاکت، تہذیب و تمدن، کثیر الثقافتی خوبیوں، دسہری آم کے باغوں اور چکن کی کڑھائی کے کام کے لیے معروف ہے۔ سنہ 2006ء میں اس کی آبادی 2،541،101 اور شرح خواندگی 68.63 فیصد تھی۔ حکومت ہند کی 2001ء کی مردم شماری، سماجی اقتصادی اشاریہ اور بنیادی سہولت اشاریہ کے مطابق ضلع لکھنؤ اقلیتوں کی گنجان آبادی والا ضلع ہے۔ کانپور کے بعد یہ شہر اتر پردیش کا سب سے بڑا شہری علاقہ ہے۔ شہر کے درمیان میں دریائے گومتی بہتا ہے جو لکھنؤ کی ثقافت کا بھی ایک حصہ ہے۔

لکھنؤ اس خطے میں واقع ہے جسے ماضی میں اودھ کہا جاتا تھا۔ لکھنؤ ہمیشہ سے ایک کثیر الثقافتی شہر رہا ہے۔ یہاں کے حکمرانوں اور نوابوں نے انسانی آداب، خوبصورت باغات، شاعری، موسیقی اور دیگر فنون لطیفہ کی خوب پزیرائی کی۔ لکھنؤ نوابوں کا شہر بھی کہلاتا ہے نیز اسے مشرق کا سنہری شہر اور شیراز ہند بھی کہتے ہیں۔ آج کا لکھنؤ ایک ترقی پزیر شہر ہے جس میں اقتصادی ترقی دکھائی دیتی ہے اور یہ بھارت کے تیزی سے بڑھ رہے بالائی غیر میٹرو پندرہ شہروں میں سے ایک ہے۔ لکھنؤ ہندی اور اردو ادب کے مراکز میں سے ایک ہے۔ یہاں زیادہ تر لوگ اردو بولتے ہیں۔ یہاں کا لکھنوی انداز گفتگو مشہور زمانہ ہے۔ اس کے علاوہ یہاں ہندی اور انگریزی زبانیں بھی بولی جاتی ہیں۔

تاریخ

روشن الدولہ کوٹھی قیصر باغ سے لی گئی لکھنؤ کی تصویر، 1858ء

قدیم تاریخ اور اشتقاقیات

قدیم دور میں لکھنؤ مملکت کوسل کا حصہ تھا۔ قدیم ہندو روایتوں کے مطابق یہ یہ رام کی وراثت تھی جسے انہوں نے اپنے بھائی لکشمن کے لیے وقف کر دیا تھا۔ چنانچہ اس کو لكشماوتی، لكشم پور یا لکھن پور کے نام سے جانا گیا، جو بعد میں بدل کر لکھنؤ ہو گیا۔ یہاں سے ایودھیا 80 میل کی دوری پر واقع ہے۔ ایک اور روایت کے مطابق اس شہر کا نام "لكھن اهير" جو "لكھن قلعہ" کے اہم فنکار تھے، کے نام پر رکھا گیا۔ تاہم دلت لوگوں کا ماننا ہے کہ "لکھن پاسی" جو علاقے کا دلت حکمران تھا یہ اس کے نام سے منسوب ہے، جسے "لکھن پور" کہا جاتا تھا جو گیارہویں صدی میں بگڑ کر لکھنؤ ہو گیا۔ ایک اور مفروضہ کے تحت شہر کا نام دولت کی ہندو دیوی لکشمی کے نام پر ہے جو اصل میں "لکشمناوتی" سے "لکشمناوت" اور آخر کار لکھنؤ ہو گیا۔

جدید تاریخ

1350ء کے بعد سے سلطنت دہلی، سلطنت جونپور، مغلیہ سلطنت اور نواب اودھ، برطانوی ایسٹ انڈیا کمپنی اور برطانوی راج کے تحت لکھنؤ اودھ کا حصہ رہا ہے۔ جنگ آزادی ہند 1857ء کے دوران میں لکھنؤ بڑے مراکز میں سے ایک تھا۔ تحریک آزادی ہند میں بھی یہ ایک اہم شمالی ہندوستانی شہر کے طور پر ابھرا۔ 1719ء تک اودھ مغلیہ سلطنت کا ایک صوبہ تھا جس کا گورنر برہان الملک سعادت علی خان تھا جس نے لکھنؤ کے قریب فیض آباد کو اپنا مرکز بنایا۔

تقریباً چوراسی سال (1394ء سے 1478ء) اودھ سلطنت جونپور کا حصہ رہا۔ 1555ء کے لگ بگ مغل شہنشاہ ہمایوں نے اسے مغلیہ سلطنت میں شامل کیا۔ شہنشاہ جہانگیر نے اسے ایک پسندیدہ شاہی افسر شیخ عبد الرحیم کو بطور ریاست عطا کیا۔ اس کے بعد یہ اس کی اولاد "شیخ زادوں" کے زیر رہا۔

نواب آصف الدولہ (1775–1797)

سعادت علی خان (1752–1814)

اودھ کے نوابوں نے لکھنؤ کو اپنا دار الحکومت بنایا۔ شہر شمالی ہندوستان کا ثقافتی دار الحکومت بنا۔ اس وقت کے نواب، عیاش اور شاہانہ طرز زندگی کے لیے مشہور ہوئے جو فن کے قدردان و سرپرست تھے۔ ان کے دور میں موسیقی اور رقص کو فروغ ملا، اس کے علاوہ انہوں نے متعدد یادگاریں بھی تعمیر کیں۔ ان میں بڑا امام باڑا، چھوٹا امام باڑا اور رومی دروازہ قابلِ ذکر ہیں۔ نوابوں کی خاص میراث میں خطے کی ہندو مسلم ثقافت کے میل جول کو گنگا جمنی تہذیب کے نام سے یاد کیا جاتا ہے۔

مغلیہ سلطنت کے زوال کے بعد علاقے میں کئی خود مختار ریاستیں قائم ہوئیں۔ اودھ کے تیسرے نواب شجاع الدولہ کی نواب بنگال کی میر قاسم کی مدد کرنے پر انگریزوں سے ٹھن گئی۔ بکسر کی لڑائی میں تقریباً شکست کھانے کے بعد بھاری تاوان کے علاوہ ریاست کچھ حصے بھی انگریزوں کے حوالے کرنا پڑے۔

لکھنؤ کے موجودہ شکل کی بنیاد اودھ کے چوتھے نواب آصف الدولہ نے 1775ء میں رکھی۔ اس نے دار الحکومت فیض آباد سے لکھنؤ منتقل کیا اور اس کو ترقی دی۔ لیکن بعد کے نواب نااہل ثابت ہوئے۔ ان نوابوں کی نااہلی کے نتیجے میں آگے چل کر لارڈ ڈلہوزی نے اودھ کو بغیر جنگ کیے ہی حاصل کر کے سلطنت برطانیہ میں ملا لیا۔ 1850ء میں اودھ کے آخری نواب واجد علی شاہ نے برطانوی تابعداری قبول کر لی۔

جغرافیہ

لکھنؤ شہر کا نقشہ

دریائے گومتی لکھنؤ کی اہم جغرافیائی خصوصیات میں سے ہے۔ لکھنؤ میں سندھ و گنگ کا میدان واقع ہے اور بہت سے دیہی قصبوں اور دیہاتوں سے گھرا ہوا ہے جن میں ملیح آباد، کاکوری، موہن لال گنج، گوسین گنج، لکھنؤ، چینہٹ اور اتونجا شامل ہیں۔ مشرق میں بارہ بنکی اور بہرائچ ضلع، مغرب میں اناؤ ضلع، جنوب میں رائے بریلی ضلع جبکہ شمال میں ضلع سیتاپور اور ہردوئی ضلع واقع ہیں۔

آب و ہوا

لکھنؤ کی آب و ہوا مرطوب ذیلی استوائی ہے، فروری کے وسط نومبر تک خشک سردی، اواخر مارچ سے جون تک موسم خشک گرم ہوتا ہے۔ برسات کا موسم جولائی سے ستمبر کے وسط تک ہوتا ہے۔ موسم سرما میں زیادہ سے زیادہ درجہ حرارت 25 ° س (77 ° ف) اور کم سے کم 7 ° س (45 ° ف) ہوتا ہے۔ دھند اواخر جنوری سے وسط دسمبر میں بہت عام ہے۔ موسم گرما میں درجہ حرارت 45 ° س (113 ° ف) تا 40 ° س (104 ° ف) تک پہنچ جاتا ہے۔

آب ہوا معلومات برائے لکھنؤ (چودھری چرن سنگھ بین الاقوامی ہوائی اڈا)
مہینا	جنوری	فروری	مارچ	اپریل	مئی	جون	جولائی	اگست	ستمبر	اکتوبر	نومبر	دسمبر	سال
بلند ترین °س (°ف)	30.4 (86.7)	34.2 (93.6)	40.9 (105.6)	45.0 (113)	46.2 (115.2)	47.7 (117.9)	44.2 (111.6)	40.4 (104.7)	40.1 (104.2)	37.7 (99.9)	38.0 (100.4)	29.9 (85.8)	47.7 (117.9)
اوسط بلند °س (°ف)	22.5 (72.5)	25.8 (78.4)	32.0 (89.6)	38.0 (100.4)	40.0 (104)	38.4 (101.1)	33.9 (93)	33.2 (91.8)	33.1 (91.6)	32.8 (91)	29.2 (84.6)	24.6 (76.3)	32.0 (89.6)
اوسط کم °س (°ف)	7.5 (45.5)	9.8 (49.6)	14.5 (58.1)	20.5 (68.9)	24.6 (76.3)	26.7 (80.1)	26.0 (78.8)	25.6 (78.1)	24.1 (75.4)	19.1 (66.4)	12.8 (55)	8.4 (47.1)	18.3 (64.9)
ریکارڈ کم °س (°ف)	−1.0 (30.2)	0.0 (32)	5.4 (41.7)	10.9 (51.6)	17.0 (62.6)	19.7 (67.5)	21.5 (70.7)	22.2 (72)	17.2 (63)	10.0 (50)	3.9 (39)	0.5 (32.9)	−1.0 (30.2)
اوسط بارش مم (انچ)	20.2 (0.795)	16.0 (0.63)	10.0 (0.394)	5.0 (0.197)	18.4 (0.724)	122.9 (4.839)	269.9 (10.626)	255.3 (10.051)	211.5 (8.327)	40.9 (1.61)	7.4 (0.291)	12.6 (0.496)	990.1 (38.98)
اوسط بارش ایام	1.5	1.5	1.0	0.6	1.6	5.4	12.0	11.6	8.6	1.7	0.5	0.8	46.8
ماخذ: India Meteorological Department (record high and low up to 2010)

آبادیات

آبادی میں اضافہ
مردم شماری	آبادی		%±
1871	284,800		—
1881	261,300		-8.3%
1891	273,000		4.5%
1901	264,000		-3.3%
1911	259,800		-1.6%
1921	240,600		-7.4%
1931	274,700		14.2%
1941	387,177		40.9%
1951	496,900		28.3%
1961	595,400		19.8%
1971	814,000		36.7%
1981	1,007,604		23.8%
1991	1,669,204		65.7%
2001	2,245,509		34.5%
2011	2,902,601		29.3%
source:

لکھنؤ میں مذہب (2011)
مذہب			فیصد
ہندو مت			75%
اسلام			22%
سکھ مت			0.56%
مسیحیت			0.7%
دیگر			1.34%

لکھنؤ میں شہری ہم بستگی کی آبادی 1981ء ایک ملین تھی۔ 2001ء کی مردم شماری کے تخمینے کے مطابق یہ 2.24 ملین تک بڑھ گئی۔ ان میں 60،000 افراد لکھنؤ چھاؤنی میں جبکہ 2.18 ملین لکھنؤ شہر میں آباد ہیں۔

نقل و حمل

سڑکیں

لکھنؤ کی ایک سڑک

چار قومی شاہراہیں لکھنؤ کے حضرت گنج چوراہے سے شروع ہوتی ہیں، جن کی تفصیل مندرجہ ذیل ہے:

• قومی شاہراہ 24 – دہلی کو
• قومی شاہراہ 30 – الٰہ آباد کو
• قومی شاہراہ 25 – شوپوری کو براستہ جھانسی
• قومی شاہراہ 28 – برونی کو

شہر میں عوامی نقل و حمل کے لیے ٹیکسیاں، میٹرو بس، سائیکل رکشے اور آٹو رکشے دستیاب ہیں۔

اندرون شہر بسیں

لکھنؤ شہر کی بس سروس اترپردیش اسٹیٹ روڈ ٹرانسپورٹ کارپوریشن کے زیر انتظام ہے۔ اس میں 9،500 کے مجموعی بیڑے سے 300 سی این جی بسوں موجود ہیں۔ شہر میں تقریباً 35 روٹ ہیں۔ چار بس ڈپو گومتی نگر، چار باغ، اموسی، دوبگگا میں موجود ہیں۔

بین ریاستی بسیں

بین ریاستی بسیوں کا اڈا بھیم راؤ رام جی امبیڈکر بین ریاستی بس ٹرمینل لکھنؤ سے دیگر ریاستوں کو بس خدمات فراہم کرتا ہے جو نیشنل ہائی وے 25 پر واقع ہے۔ جبکہ قیصر باغ میں بھی ایک چھوٹا بس اڈا موجود ہے۔ اتر پردیش کے شہروں الٰہ آباد، وارانسی، جے پور، آگرہ، دہلی، گورکھپور کے لیے اترپردیش اسٹیٹ روڈ ٹرانسپورٹ کارپوریشن بس سروس فراہم کرتا ہے، جبکہ دیگر ریاستوں کے لیے بین ریاستی بس سروس جے پور، نئی دہلی، گوالیار، بھرت پور، راجستھان، سنگرولی، فرید آباد، گرو گرام، دوسہ، اجمیر، دہرہ دون اور ہردوار کے لیے دستیاب ہے۔

ریلوے

لکھنؤ جنکشن ریلوے اسٹیشن

لکھنؤ شہر کے کئی علاقوں میں متعدد ریلوے سٹیشن موجود ہیں۔ جن میں اہم لکھنؤ جنکشن ریلوے اسٹیشن اور لکھنؤ جنکشن ریلوے اسٹیشن ہیں۔ لکھنؤ شہر ایک اہم جنکشن ہے جو ملک اور ریاست کے شہروں کو ملاتا ہے مثلاً نئی دہلی، ممبئی، کولکاتا، چندی گڑھ، امرتسر، جموں، چینائی، حیدرآباد، دکن، بنگلور، احمد آباد، پونے، اندور، بھوپال، گوالیار، جبل پور، جے پور اور سیوان۔

شہر میں کل چودہ ریلوے سٹیشن ہیں جو براڈ گیج اور میٹر گیج سے دیگر اسٹیشنوں سے منسلک ہیں۔

فضائی نقل و حمل

تفصیلی مضمون کے لیے چودھری چرن سنگھ بین الاقوامی ہوائی اڈا ملاحظہ کریں۔

چودھری چرن سنگھ بین الاقوامی ہوائی اڈا

چودھری چرن سنگھ بین الاقوامی ہوائی اڈے کے ذریعے لکھنؤ نئی دہلی، پٹنہ، کولکاتا، ممبئی، بنگلور، احمد آباد، حیدرآباد، چینائی، گوہاٹی اور ملک کے دیگر بڑے شہروں سے براہ راست منسکک ہے۔

اس کے علاوہ یہاں سے بین الاقوامی پروازیں ابوظبی، دبئی، مسقط، شارجہ، سنگاپور، بینکاک، دمام اور جدہ جاتی ہیں۔

میٹرو

تفصیلی مضمون کے لیے لکھنؤ میٹرو ملاحظہ کریں۔

لکھنؤ میٹرو اتر پردیش کے شہر لکھنؤ میں تعمیر کیا جانے والا کثیر نقل حمل (ماس ریپڈ ٹرانزٹ سسٹم) کا ایک نظام ہے۔ اس کی تعمیر کا آغاز27 ستمبر 2014ء کو ہوا۔

سائکل سواری

لکھنؤ اتر پردیش کا سب سے زیادہ سائیکل دوستانہ شہروں میں سے ایک ہے۔ یہاں سائیکل سواری کے لیے خاص راستے موجود ہیں۔ ایمسٹرڈیم کی طرز پر اسے زیادہ سائیکل دوستانہ بنانے کے لیے نئی سائیکل راہیں شہر میں تعمیر کی جا رہی ہیں، جہاں سائیکل کرائے پر لینے کی سہولیات بھی موجود ہیں۔ 2015ء میں لکھنؤ میں لکھنؤ سائکلتھون (The Lucknow Cyclothon) نامی ایک قومی سطح سائیکلنگ ایونٹ کی میزبانی بھی کی۔

فن تعمیر

رومی دروازہ

لکھنؤ کی عمارتیں مختلف طرز تعمیر کی ہیں جن میں برطانوی اور مغلیہ دور کی تعمیرات بہت شاندار ہیں۔ ان عمارتوں میں سے آدھی سے زیادہ شہر کے پرانے حصے میں واقع ہیں۔ اترپردیش کا محکمہ سیاحت مقبول یادگاروں کو سیاحوں کے لیے ایک "ثقافتی ورثہ واک" کے طور پر منظم کرتا ہے۔

لکھنؤ کی اہم یادگار عمارتوں کی فہرست مندرجہ ذیل ہے۔

• آصفی مسجد
• رومی دروازہ
• لکھنؤ یونیورسٹی
• دلکشا کوٹھی
• لا مارٹنیری کالج

• 
  بڑا امام باڑا، قدیم لکھنؤ
• 
  لا مارٹنیری لکھنؤ
• 
  کیتھیڈرل، حضرت گنج
• 
  حضرت گنج مارکیٹ

ثقافت

پان کی تھالی میں کتھا، چونا اور سپاری

لکھنؤ اپنی وراثت میں ملی ثقافت کو جدید طرز زندگی کے ساتھ بڑی خوبصورتی کے ساتھ ملائے ہوئے ہے۔ بھارت کے اہم شہروں میں گنے جانے والے لکھنؤ کی ثقافت میں جذبات کی گرماہٹ کے ساتھ اعلیٰ احساس اور محبت بھی شامل ہے۔ لکھنؤ کے معاشرے میں نوابوں کے وقت سے ہی پہلے آپ! والا انداز رچا بسا ہے۔ وقت کے ساتھ ہر طرف جدیدیت کا دور دورہ ہے تاہم اب بھی شہر کی آبادی کا ایک حصہ اپنی تہذیب کو سنبھالے ہوئے ہے۔ تہذیب یہاں دو بڑے مذاہب کے لوگوں کو ایک ثقافت سے باندھے ہوئے ہے۔ یہ ثقافت یہاں کے نوابوں کے دور سے چلی آ رہی ہے۔ لکھنوی پان یہاں کی ثقافت کا اٹوٹ حصہ ہے جس کے بغیر لکھنؤ نامکمل لگتا ہے۔

زبان اور شاعری

لکھنؤ میں ہندی اور اردو دونوں زبانیں بولی جاتی ہیں لیکن اردو کو یہاں صدیوں سے خاص اہمیت حاصل رہی ہے۔ جب دہلی حالات اچھے نہ رہے تو بہت سے شاعروں نے لکھنؤ کا رخ کیا۔ تب سے اردو شاعری کے دو ٹھکانے ہو گئے، دہلی اور لکھنؤ۔ جبکہ دہلی صوفی شاعری اور لکھنؤ غزل، عیش و آرام اور عشقیہ شاعری کا مرکز بنا۔ نوابوں کے دورے میں اردو کی خصوصی نشو و نما ہوئی اور یہ بھارت کی تہذیب والی زبان کے طور پر ابھری۔ یہاں کے مشہور شاعروں میں حیدرعلی آتش، عامر مینائی، مرزا محمد ہادی رسوا، مصحفی، انشا، صفی لکھنوی، مير تقی میر شامل ہیں۔ لکھنؤ شیعہ ثقافت کے دنیا کے عظیم شہروں میں سے ایک ہے۔ میر انیس اور مرزا دبیر اردو مرثیہ گوئی کے لیے مشہور ہیں۔

رقص اور موسیقی

کتھک رقص

مشہور ہندوستانی رقص کتھک نے یہیں ترقی پائی۔ اودھ کے آخری نواب واجد علی شاہ کتھک کے بڑے پرستاروں میں سے تھے۔ لکھنؤ مشہور غزل گلوکاہ بیگم اختر کا بھی شہر رہا ہے۔ وہ غزل گائکی میں معروف تھیں اور اسے نئی بلندیوں تک پہنچایا۔ لکھنؤ کی بھاتكھڈے موسیقی یونیورسٹی کا نام یہاں کے عظیم موسیقار پنڈت وشنو نارائن بھاتكھڈے کے نام پر رکھا ہوا ہے۔ سری لنکا، نیپال، بہت سے ایشیائی ممالک اور دنیا بھر سے طالبعلم یہاں رقص اور موسیقی کی تعلیم حاصل کرنے آتے ہیں۔ لکھنؤ نے کئی گلوکار دیے ہیں جن میں سے نوشاد علی، طلعت محمود، انوپ جلوٹا اور بابا سہگل انتہائی اہم ہیں۔ لکھنؤ شہر برطانوی پاپ گلوکار كلف رچرڈ کا جائے پیدائش بھی ہے۔

فلم

جاوید اختر

لکھنؤ ہندی فلمی صنعت کا شروع سے ہی مرکز رہا ہے۔ یہ کہنا مبالغہ نہ ہوگا کہ لکھنوی رابطے کے بغیر، بالی ووڈ کبھی اس بلندی پر نہیں آ پاتا جہاں وہ اب موجود ہے۔ اودھ سے بہت سکرپٹ مصنف اور نغمہ نگار ہیں، جیسے مجروح سلطان پوری، کیفی اعظمی، جاوید اختر، علی رضا، وجاہت مرزا (مدر انڈیا اور گنگا جمنا کے مصنف)، امرت لال ناگر، علی سردار جعفری اور کے پی سکسینہ جنہوں نے بھارتی فلم کو بلندی پر پہنچایا۔ لکھنؤ پر بہت سی مشہور فلمیں بنی ہیں جیسے ششی کپور کی جنون، مظفر علی کی امرا ؤ جان اور گمن، ستیہ جیت رائے کی شطرنج کے کھلاڑی اور اسماعیل مرچنٹ کی شیکسپیئر والا کی بھی جزوی شوٹنگ یہیں ہوئی تھی۔

بہو بیگم، محبوب کی مہندی، میرے حضور، چودھویں کا چاند، پاکیزہ، میں میری بیوی اور وہ، سحر، انور اور بہت سی ہندی فلمیں یا تو لکھنؤ میں بنی ہیں یا ان کا پس منظر لکھنؤ کا ہے۔ غدر فلم میں بھی پاکستان کے مناظر لکھنؤ میں فلمائے گئے ہیں۔ اس میں لال پل، لکھنؤ اور لا مارٹينير کالج کے مناظر ہیں۔

روایتی ملبوسات

گھاگرا

لکھنؤ اس گھاگروں لیے مشہور ہے۔ یہ خواتین کا ایک روایتی لباس ہے ابتدا اودھ کے نوابوں کے دور سے ہوئی۔

چکن کی کڑھائی

چکن، یہاں کی کڑھائی کا بہترین نمونہ ہے اور لکھنوی زردوزی یہاں کی چھوٹی صنعت ہے جو کرتے اور ساڑیوں جیسے کپڑوں پر اپنا فن دکھاتے ہیں۔ اس صنعت کا زیادہ تر حصہ پرانے لکھنؤ کے چوک علاقے میں پھیلا ہوا ہے۔ یہاں کے بازار چکن کڑھائی کی دکانوں سے بھرے ہوئے ہیں۔ اس ماہر اور مشہور کاریگروں میں استاد فیاض خاں اور حسن مرزا صاحب تھے۔

پکوان

اودھ کے علاقے کی اپنی ایک الگ خاص پہچان نوابی پکوان ہیں۔ اس میں مختلف طرح کی بریانی، کباب، قورما، نہاری، كلچے، شیر مال، زردہ، رومالی روٹی اور وركی پراٹھا اور روٹیاں وغیرہ، کاکوری کباب، گلاوٹی کباب، پتیلی کباب، بوٹی کباب، گھٹوا کباب اور شامی کباب اہم ہیں۔ شہر میں بہت سی جگہ یہ پکوان ملیں گے۔ یہ تمام طرح کے اور تمام بجٹ کے ہوں گے۔ جہاں ایک طرف 1805ء میں قائم کردہ رام آسرے حلوائی کی مکھن گلوری مشہور ہے، وہیں اکبری گیٹ پر ملنے والے حاجی مراد علی کے ٹنڈے کے کباب بھی کم مشہور نہیں ہیں۔ اس کے علاوہ دیگر نوابی پكوانوں جیسے دمپخت، لچھے دار پیاز اور سبز چٹنی کے ساتھ سیخ کباب اور رومالی روٹی کا بھی جواب نہیں ہے۔ لکھنؤ کی چاٹ ہندوستان کی بہترین چاٹ میں سے ایک ہے اور کھانے کے آخر میں مشہور عالم لکھنؤ کے پان جن کا کوئی ثانی نہیں ہے۔

لکھنؤ میں روٹیوں کی کئی اقسام پائی جاتی ہیں۔ ایسی ہی روٹیاں یہاں کے ایک پرانے بازار میں آج بھی ملتی ہیں، بلکہ یہ بازار روٹیوں کا بازار ہی ہے۔ اکبری گیٹ سے نکھاس چوکی کے پیچھے تک یہ بازار ہے، جہاں شیر مال، نان، خمیری روٹی، رومالی روٹی، كلچہ جیسی کئی دیگر طرح کی روٹیاں مل جائیں گی۔ پرانے لکھنؤ کے اس روٹی بازار میں مختلف قسم کی روٹیوں کی تقریباً 15 دکانیں ہیں جہاں صبح نو سے رات نو بجے تک گرم روٹی خریدی جا سکتی ہے۔ بہت سے پرانے نامی ہوٹل بھی اس گلی کے قریب ہیں، جہاں آپ کی من پسند روٹی کے ساتھ گوشت کے پکوان بھی ملتے ہیں۔

لکھنؤ کے پکوان

• 
• 
• 
• 
• 
• 
• 
• 

تہوار

لکھنؤ میں محرم کا جلوس

عام ہندوستانی تہوار مثلاً کرسمس، دیوالی، درگا پوجا، عید الفطر، عید الاضحی، ہولی، رکشا بندھن، دسہرہ یہاں جوش و خروش سے منائے جاتے ہیں۔ دیگر تہوار یا جلوسوں میں سے کچھ یہ ہیں:

لکھنؤ مہوتسو

لکھنؤ فیسٹیول ہر سال اتر پردیش

کے فن اور ثقافت کو ظاہر کرنے اور سیاحت کو فروغ دینے کے منظم کیا جاتا ہے۔

لکھنؤ لٹریچر فیسٹیول

2013ء کے بعد یہ ہر سال نومبر کے مہینے میں منعقد کیا جانے والا ایک سالانہ ادبی میلا میں ہے۔

محرم اور عاشورا

لکھنؤ اہل تشیع کا گڑھ ہے اور بھارت میں شیعہ ثقافت کے نمونے کے طور پر جانا جاتا ہے۔ مسلمانوں اسلامی تقویم کے پہلے مہینے محرم اور عاشورا حسین ابن علی کی یاد میں مناتے ہیں۔

چپ تعزیہ

اہل تشیع کے گیارہویں امام حسن بن علی عسکری کی وفات کے سوگ میں 8 ربیع الاول کو مذہبی جلوس کی صورت میں منایا جاتا ہے۔

بڑا منگل

بڑا منگل یا ہنومان جینتی ایک تہوار ہے جو ہنومان کی پیدائش کی خوشی میں مئی کے مہینے میں پرانا مندر میں منایا جاتا ہے۔

معیار حیات

لکھنؤ کو ایل جی کارپوریشن اور آئی ایم آر بی انٹرنیشنل کے سروے کے مطابق چندی گڑھ کے بعد "بھارت کا دوسرا سب سے خوش شہر" قرار دیا گیا ہے۔ اس نئی دہلی، بنگلور اور چینائی سمیت بھارت کے دیگر میٹروپولیٹن علاقوں کے مقابلے میں لکھنؤ خوراک، ٹرانزٹ اور مجموعی طور پر شہری سکون میں بہتر پایا گیا ہے۔

معیشت

ٹاٹا کنسلٹنسی سروسز کیمپس، گومتی نگر

لکھنؤ شمالی بھارت کی ایک اہم مارکیٹ اور کمرشل شہر ہی نہیں، بلکہ مصنوعات اور خدمات کا ابھرتا ہوا مرکز بھی بنتا جا رہا ہے۔ اترپردیش ریاست کے دار الحکومت ہونے کی وجہ سے یہاں سرکاری اور نجی سیکٹر انٹرپرائز بہت زیادہ ہیں۔ لکھنؤ شہری ہم بستگی میں بڑی صنعتوں میں ایئروناٹکس، مشینی اوزار، کیمیکلز، فرنیچر اور چکن کڑھائی شامل ہیں۔

لکھنؤ بھارت کے سب سے زیادہ خام ملکی پیداوار والی شہروں میں سے ایک ہے۔ لکھنؤ سافٹ ویئر اور آئی ٹی کا ایک بڑھتا ہوا آئی ٹی مرکز ہے اور شہر میں آئی ٹی کمپنیاں موجود ہیں۔ ٹاٹا کنسلٹنسی سروسز گومتی نگر میں بڑی کمپنیوں میں سے ایک ہے۔ بہت سے مقامی آزاد مصدر ٹیکنالوجی کمپنیاں بھی موجود ہیں۔

شہر میں ٹیکسٹائل کی صنعت کو فروغ دینے کے لیے بھارتی حکومت 200 کروڑ روپے (2000 ملین روپے) مختص کیے ہیں تا کہ شہر میں ایک ٹیکسٹائل کے کاروبار کا کلسٹر قائم کیا جا سکے۔

حکومت اور سیاست

اتر پردیش ودھان سبھا

حکومت اترپردیش کی نشست کے طور پر، لکھنؤ اترپردیش اسمبلی، الہ آباد ہائی کورٹ اور متعدد سرکاری محکموں اور ایجنسیوں کا مقام ہے۔

1 مئی 1963ء کے بعد سے لکھنؤ بھارتی فوج کی سینٹرل کمانڈ کا ہیڈکوارٹر ہے۔ جبکہ اس سے پہلے یہ مشرقی کمانڈ کا ہیڈکوارٹر تھا۔

شہر سے لوک سبھا (بھارتی پارلیمان) کے ساتھ ساتھ اترپردیش ودھان سبھا (ریاستی اسمبلی) کے لیے بھی ارکان سے منتخب ہوتے ہیں۔ لکھنؤ میں دو لوک سبھا حلقے لکھنؤ اور موہن لال گنج اور نو ودھان سبھا حلقے ہیں۔ 2008ء میں شہر میں 110 وارڈ تھے۔

وزارت شہری ہوابازی، حکومت ہند کے تحت بھارت کے ریلوے سیفٹی کمیشن کا ہیڈ آفس لکھنؤ میں واقع ہے۔

تعلیم

لکھنؤ یونیورسٹی

لکھنؤ میں ملک کے بہت سے اعلیٰ تعلیمی اور تحقیقی ادارے موجود ہیں۔ ان میں سے کنگ جارج میڈیکل کالج اور بیربل ساہنی ریسرچ انسٹی ٹیوٹ اہم ہیں۔ لکھنؤ میں چھ جامعات ہیں:

• لکھنؤ یونیورسٹی
• ڈاکٹر اے پی جے عبدالکلام ٹیکنیکل یونیورسٹی
• رام منوہر لوہیا قومی یونیورسٹی
• باباصاحب بھیم راؤ امبیڈکر یونیورسٹی
• امیٹی یونیورسٹی
• انٹیگرل یونیورسٹی
• دار العلوم ندوۃالعلماء

اس کے علاوہ یہاں بہت سے اعلیٰ ثانوی تعلیمی ادارے، سرکاری اور نجی اسکول بھی موجود ہیں۔ ان میں سے کچھ اہم سٹی مونٹیسری اسکول، لا مارٹنیری کالج، طے پوریا اسکول، كلون تالكے دارس کالج، ایما تھامسن اسکول، سینٹ فرانسس اسکول وغیرہ ہیں۔

ذرائع ابلاغ

لکھنؤ تاریخی طور پر صحافت کا ایک اہم مرکز رہا ہے۔ بھارت کے پہلے وزیر اعظم پنڈت جواہر لال نہرو کا دوسری جنگ عظیم سے قبل شروع کیا جانے والا دی نیشنل ہیرالڈ لکھنؤ سے ہی شائع ہوتا تھا۔

شہر کے اہم انگریزی اخباروں میں دی ٹائمز آف انڈیا، ہندوستان ٹائمز، دی پائنیر اور انڈین ایکسپریس شامل ہیں۔ ان کے علاوہ بھی بہت سے روزنامے انگریزی، ہندی اور اردو زبانوں میں بھی شائع ہوتے ہیں۔ پریس ٹرسٹ آف انڈیا اور یونائیٹڈ نیوز آف انڈیا کے دفتر شہر میں موجود ہیں اور ملک کے تمام اہم اخباروں کے صحافی لکھنؤ میں موجود رہتے ہیں۔

ریڈیو

آل انڈیا ریڈیو کے ابتدائی اسٹیشنوں میں سے لکھنؤ میں قائم کیے گئے۔ یہاں میڈیم ویوز پر نشریات کی جاتی ہیں۔ اس کے علاوہ یہاں ایف ایم نشریات بھی 2000ء میں شروع کی گئیں۔ شہر میں مندرجہ ذیل ریڈیو اسٹیشن چل رہے ہیں۔

• 91.1 میگا ہرٹز ریڈیو سٹی
• 93.5 میگا ہرٹز ریڈ ایف ایم
• 98.3 میگا ہرٹز ریڈیو مرچی
• 100.7 میگا ہرٹز اے آئِ آر ایف ایم رین بو
• 105.6 میگا ہرٹز گیانوانی ایجوکیشنل

انٹرنیٹ

شہر میں انٹرنیٹ کے لیے براڈ بینڈ انٹرنیٹ اور ویڈیو کانفرینسنگ کی سہولت دستیاب ہیں۔ گھریلو صارفین اور کارپوریٹ صارفین کے لیے اچھی رفتار کا براڈبینڈ انٹرنیٹ کنکشن دستیاب ہوتا ہے۔ شہر میں بہت سے انٹرنیٹ کیفے بھی موجود ہیں۔

کھیل

کے ڈی سنگھ بابو اسٹیڈیم، لکھنؤ

لکھنؤ بھارتی بیڈمنٹن ایسوسی ایشن کا ہیڈ کوارٹر ہے۔ گومتی نگر میں واقع ہے۔ یہ 1934ء میں قائم کیا گیا تھا اور 1936ء سے ہندوستان میں قومی سطح کے ٹورنامنٹ کا انعقاد کراتا ہے۔ جونیئر سطح کے بیڈمنٹن کھلاڑیوں لکھنؤ میں ان کی تربیت کے بعد ا بنگلور بھیجا جاتا ہے۔

دہائیوں سے لکھنؤ عظیم الشان شیش محل کرکٹ ٹورنامنٹ کی میزبانی کر رہا ہے۔ موجودہ دور میں کرکٹ، فٹ بال، بیڈمنٹن، گالف اور ہاکی شہر کے سب سے زیادہ مقبول کھیل ہیں۔ سید مودی گراں پری منعقدہ ایک بین الاقوامی بیڈمنٹن مقابلہ ہے۔

اہم کھیلوں کا مرکز کے ڈی سنگھ بابو اسٹیڈیم، لکھنؤ ہے۔ شہر کے دیگر اسٹیڈیموں میں دھیان چند آسٹروٹرف اسٹیڈیم، محمد شاہد سنٹیتھک ہاکی سٹیڈیم، ڈاکٹر اکھلیش داس گپتا اسٹیڈیم اور بابو بنارسی داس یو پی بیڈمنٹن اکیڈمی شامل ہیں۔

سیاحتی اور تفریحی مقامات

بڑا امام باڑا

چھوٹا امام باڑا

شہر اور ارد گرد بہت قابل دید مقامات موجود ہیں۔ ان میں تاریخی مقامات، باغ، تفریح مقامات اور شاپنگ مال وغیرہ شامل ہیں۔ یہاں کئی امام باڑے ہیں، ان میں بڑا امام باڑہ اور چھوٹا امام باڑا کافی اہم ہیں۔ مشہور بڑے امام باڑے کی تاریخی اور ثقافتی اہمیت ہے۔ اس امام باڑے کی تعمیر نواب آصف الدولہ نے 1784ء میں کرواائی تھی۔ یہ بہت بڑا گنبد نما ہال ہے جو 50 میٹر طویل اور 15 میٹر بلند ہے۔ یہاں ایک منفرد بھول بھلیاں بھی موجود ہیں۔ اس امام باڑے میں ایکآصفی مسجد بھی ہے۔ مسجد کے احاطے کے صحن میں دو اونچے مينار ہیں۔ اس کے علاوہ چھوٹا امام باڑا جس کا اصلی نام حسین آباد امام باڑا ہے جسے 1838ء میں ریاست اودھ کے تیسرے نواب محمد علی شاہ نے تعمیر کروایا تھا۔

سعادت علی خان کا مقبرہ بیگم حضرت محل پارک کے قریب واقع ہے۔ اس کے ساتھ ہی خورشید زیدی کا مقبرہ بھی ہے۔ یہ مقبرہ اودھ فن تعمیر کا شاندار نمونہ ہے۔ مقبرہ کی شاندار چھت اور گنبد اس کی خاصیت ہیں۔ بڑے امام باڑے کے باہر ہی رومی دروازہ ہے۔ جامع مسجد حسین آباد امام باڑے کے مغربی سمت واقع ہے۔ اس مسجد کی تعمیر محمد شاہ نے شروع کی لیکن 1840ء میں اس کی موت کے بعد اس کی بیوی نے اسے مکمل کروایا۔ موتی محل دریائے گومتی کے کنارے پر بنی تین عمارتوں میں سے اہم ہے۔ اسے سعادت علی خاں نے بنوایا تھا۔

لکھنؤ ریزیڈینسی کی باقیات برطانوی دور کی واضح تصویر دکھاتے ہیں۔ جنگ آزادی ہند 1857ء کے وقت یہ ریزیڈینسی برطانوی ایسٹ انڈیا کمپنی کے ایجنٹ کے گھر تھا۔ یہ تاریخی عمارت حضرت گنج کے علاقے میں گورنر کی رہائش گاہ کے قریب ہے۔ لکھنؤ کا گھنٹہ گھر بھارت کا سب سے گھنٹہ گھر ہے۔

کوکریل فارست ایک پکنک کی جگہ ہے۔ یہاں مگر مچھوں اور کچھوں کی ایک محفوظ پناہ گاہ ہے۔ بنارسی باغ میں واقع ایک چڑیا گھر ہے، جس کا اصل نام پرنس آف ویلز وائلڈ لائف ریزرو ہے۔ مقامی لوگ اس چڑیا گھر کو بنارسی باغ کہتے ہیں۔ اس باغ میں ایک عجائب گھر بھی ہے۔

ان کے علاوہ رومی دروازہ، چھتر منزل، ہاتھی پارک، بدھ پارک، نیبو پارک میرین ڈرائیو اور اندرا گاندھی برج بھی قابل دید ہیں۔

اہم تاریخی مقامات کی فہرست

رومی دروازہ

• آصفی مسجد
• چھوٹا امام باڑا
• امام باڑا غفران مآب
• امین آباد
• لا مارٹنیری لکھنؤ
• قیصر باغ
• پکا پل/لال پل – (ہارڈنگ برج)
• رومی دروازہ
• امام باڑا شاہ نجف
• درگاہ حضرت عباس
• دلکشا کوٹھی
• کربلا دیانت الدولہ
• مقبرہ میر انیس
• امام باڑا سبطین آباد (مقبرہ امجد علی شاہ)
• روضہ کاظمین
• ریزیڈینسی
• طالکٹورا کربلا
• ٹائل ولی مسجد (شاہی مسجد)
• آصفی مسجد (بڑا امام باڑا کمپلیکس)
• عالم باغ
• بیگم حضرت محل پارک

• 
  گومتی نگر میں لوہیا پارک
• 
  امبیڈکر میموریل پارک، لکھنؤ
• 
  مرین ڈرائیو
• 
  مشرا پارک میں جھیل

حیوانیہ اور نباتیہ

لکھنؤ میں جنگل کا علاقہ 4.66 فیصد ہے۔ لکھنؤ روایتی طور پر لکھنوی آم (خاص طور پر دسہری آم)، خربوزہ اور قریبی علاقوں میں اگائے جا رہے اناج کی منڈی رہا ہے۔ یہاں کے مشہور ملیح آبادی دسہری آم کو جغرافیائی اشارے کا خصوصی قانونی درجہ حاصل ہو چکا ہے۔ ایک مختلف ذائقہ اور مہک کی وجہ دسہری آم کی دنیا بھر میں خاص پہچان بنی ہوئی ہے۔ سرکاری اعداد و شمار کے مطابق ملیح آبادی دسہری آم تقریباً 6،253 ہیکٹر پر اگائے جاتے ہیں اور ان کی پیداوار 9 5،6583 9 ٹن ہے۔

گنے کے کھیت اور چینی کی ملیں بھی قریب ہی واقع ہیں۔ ان کی وجہ موہن میکنس بريوری جیسی کمپنیاں یہاں اپنی ملیں لگانے کی طرف متوجہ ہوئے ہیں۔ موہن میکنس کا یونٹ 1855 میں قائم ہوا تھا۔ یہ ایشیا کی پہلی تجارتی بريوری تھی۔

لکھنؤ چڑیا گھر ملک میں سب سے قدیم چڑیا گھروں میں سے ایک ہے جسے 1921ء میں قائم کیا گیا تھا۔ یہ ایشیا اور دیگر براعظموں سے جانوروں کے ایک کثیر تعداد موجود ہے۔ شہر بھی ایک نباتیات باغ بھی ہے۔ اس میں اترپردیش اسٹیٹ میوزیم بھی واقع ہے۔

• 
  لکھنؤ دسہری آموں کے لیے مشہور
• 
  لکھنؤ چڑیا گھر میں ہاَتھی کا بچہ

لکھنؤ کے جڑواں شہر

ملک	شہر	ریاست / علاقہ
آسٹریلیا	برسبین	کوئنزلینڈ
کینیڈا	مانٹریال	کیوبیک

قابل ذکر شخصیات

فنون اور ثقافت

• جانثار اختر
• نوشاد

صوفی بزرگ

صوفی نظام الدین قادری گرداسپوری

شاعر، مصنفین اور صحافی

مير تقی میر

• مرزا سلامت علی دبیر
• چکبست
• حسرت موہانی
• افتخار عارف
• جاوید اختر
• محسن زیدی
• جوش ملیح آبادی
• کیفی اعظمی
• مجاز لکھنوی
• میر انیس
• مير تقی میر
• مرزا محمد ہادی رسوا
• رتن ناتھ سرشار
• الطاف فاطمہ
• شوکت صدیقی
• ابو الحسن علی حسنی ندوی
• عبد الحلیم شرر
• سید سلیمان ندوی

سیاست

بیگم حضرت محل

• واجد علی شاہ
• شجاع الدولہ
• نواب آصف الدولہ
• بیگم حضرت محل
• اٹل بہاری واجپائی
• شنکر دیال شرما
• محمد ہدایت اللہ
• محمد حلیم

کھیل

• شاہد محمود
• آفاق حسین

مزید دیکھیے

• بھارت کے شہر بلحاظ آبادی
• بھارت کے دس لاکھ سے زیادہ آبادی والے شہروں کی فہرست

بیرونی

• کرلی (ڈی موز پر مبنی) پر لکھنؤ
• Official Site of Lucknow
• The India of the Nawabs, نیو یارک ٹائمز، Published: 25 فروری 1990

مزید پڑھیے

• Poorno Chunder Mookherji (1883)۔ The Pictorial Lucknow۔ P.C. Mookherji۔ 26 دسمبر 2018 میں اصل سے آرکائیو شدہ۔ اخذ شدہ بتاریخ 11 فروری 2017 
• Veena Talwar Oldenburg (1984)۔ The Making of Colonial Lucknow, 1856–1877۔ Princeton University Press۔ ISBN 978-0-691-06590-8۔ 26 دسمبر 2018 میں اصل سے آرکائیو شدہ۔ اخذ شدہ بتاریخ 11 فروری 2017 
• Violette Graff (13 نومبر 1997)۔ Lucknow : Memories of a City۔ Oxford University Press۔ ISBN 978-0-19-563790-8۔ 26 دسمبر 2018 میں اصل سے آرکائیو شدہ۔ اخذ شدہ بتاریخ 11 فروری 2017 
• Amaresh Misra (1998)۔ Lucknow, Fire of Grace: The Story of its Renaissance, Revolution and the Aftermath۔ HarperCollins Publishers India۔ ISBN 978-81-7223-288-7۔ 26 دسمبر 2018 میں اصل سے آرکائیو شدہ۔ اخذ شدہ بتاریخ 11 فروری 2017 
• Rosie Llewellyn-Jones، Ravi Kapoor (2003)۔ Lucknow, Then and Now۔ Marg Publications۔ ISBN 978-81-85026-61-9۔ 26 دسمبر 2018 میں اصل سے آرکائیو شدہ۔ اخذ شدہ بتاریخ 11 فروری 2017 
• Rosie Llewellyn-Jones (2006)۔ Lucknow: City of Illusion۔ Prestel Verlag۔ ISBN 978-3-7913-3130-0۔ 26 دسمبر 2018 میں اصل سے آرکائیو شدہ۔ اخذ شدہ بتاریخ 11 فروری 2017 
• Shamim A. Aarzoo (2014)۔ Discovering Lucknow۔ Lucknow Society۔ ISBN 978-81-928747-0-8۔ ASIN 8192874702