افریقہ

افریقا
Africa

رقبہ	30,370,000 کلومیٹر2 (11,730,000 مربع میل)،  دوسرا
آبادی	1.1 بلین (2013, دوسرا)
کثافت آبادی	36.4/کلومیٹر2 (94/مربع میل)
لقب آبادی	افریقی
ممالک	54 (اور 2 متنازع) (فہرست ممالک)
زیر نگین علاقے	بیرونی (3) مایوٹ رے یونیوں سینٹ ہلینا، اسینشن و ترسٹان دا کونیا اندرونی (4) جزائر کناری سبتہ مادیعیرا ملیلہ
زبانیں	افریقی زبانیں
منطقۂ وقت	متناسق عالمی وقت−01:00 to متناسق عالمی وقت+04:00
بڑے شہر	شہر لاگوس قاہرہ کنشاسا جوہانسبرگ خرطوم دارالسلام اسکندریہ آبدجان کانو دار البیضاء ابادان نیروبی ابوجا

براعظم افریقا

افریقہ کا سیاسی نقشہ (ملک کا نام دیکھنے کے لیے فارہ نقشے کے اوپر لے جائیں، مضمون تک جانے کے لیے نقشے میں متعلقہ ملک پر ٹک کریں)

افریقا (africa) رقبے کے لحاظ سے کرہ ارض کا دوسرا بڑا بر اعظم، جس کے شمال میں بحیرہ روم، مشرق میں بحر ہند اور مغرب میں بحر اوقیانوس واقع ہے۔

دلکش نظاروں، گھنے جنگلات، وسیع صحراؤں اور گہری وادیوں کی سرزمین، جہاں آج 53 ممالک آباد ہیں اور ان کے باسی کئی زبانیں بولتے ہیں۔

محل وقوع

افریقا کے شمالی اور جنوبی حصے نہایت خشک اور گرم ہیں جن کا بیشتر حصہ صحراؤں پر پھیلا ہوا ہے۔ خط استوا کے ارد گرد گھنے جنگلات ہیں۔ مشرقی افریقہ میں عظیم وادی الشق کے نتیجے میں گہری وادیاں تشکیل پائیں جن میں کئی بڑی جھیلیں بھی واقع ہیں۔

براعظم کے مغرب میں دریائے نائجر بہتا ہے جو وسیع دلدلی ڈیلٹا بناتا ہوا بحر اوقیانوس میں جا گرتا ہے۔ اس کے مشرق میں دریائے کانگو افریقا کے گھنے استوائی جنگلات سے گزرتا ہے۔ براعظم کے مشرقی حصے میں عظیم وادی الشق اور ایتھوپیا کے بالائی میدان ہیں۔ قرن افریقا براعظم کا مشرق کی جانب آخری مقام ہے۔

مصنوعی سیارے سے لی گئی افریقا کی خلائی تصویر

صحرائے اعظم شمالی افریقا کے بیشتر حصے پر پھیلا ہوا دنیا کا سب سے بڑا صحرا ہے۔ اس عظیم صحرا کا ایک چوتھائی حصہ ریتیلے ٹیلوں پر مشتمل ہے جبکہ بقیہ پتھریلے خشک میدان ہیں۔ براعظم کے دیگر بڑے صحراؤں میں نمیب اور کالاہاری شامل ہیں۔

صحرائے اعظم کے جنوب میں صحرائی اور جنگلی علاقوں کو چھوڑ کر پورے براعظم میں گھاس کے وسیع میدان ہیں جو سوانا کہلاتے ہیں۔ یہی میدان ہاتھی سمیت افریقا کے دیگر مشہور جانوروں کے مسکن ہیں۔

مشرق میں عظیم وادی الشق ہے، جو دراصل زمین میں ایک عظیم دراڑ کے نتیجے میں وجود میں آئی۔ یہ عظیم دراڑ جھیل نیاسا سے بحیرہ احمر تک پھیلی ہوئی ہے۔ اگر یہ دراڑ مزید پھیلتی گئی تو ایک دن قرن افریقا براعظم سے الگ ہو جائے گا۔

موسم

خط استوا کے ساتھ ساتھ بارشوں کے باعث گھنے جنگلات واقع ہیں یہاں کا موسم گرم اور نمی سے بھرپور ہے۔

آزادی

نوآبادیاتی دور میں افریقا کے مختلف ممالک کا نقشہ، مختلف رنگ مختلف قابض قوتوں کو ظاہر کر رہے ہیں جن کی نشاندہی کی گئی ہے

1960ء کی دہائی تک افریقا کا بیشتر حصہ یورپی ممالک کے قبضے میں تھا اور طویل غلامی کے بعد 1980ء کی دہائی تک تقریباً تمام ممالک کو آزادی مل گئی لیکن ان کے وسائل نو آبادیاتی دور میں غصب کر لیے گئے تھے اس لیے اقتصادی و معاشی طور پر وہ آج تک نہ سنبھل سکے اور غربت کی دلدل میں پھنسے ہوئے ہیں۔ بڑے پیمانے پر جہالت کے باعث نسلی و قومی تعصب نے بھی افریقی عوام کے دلوں میں جڑیں پکڑیں جس کے نتیجے میں خوفناک جنگیں اور خانہ جنگیاں ہوئیں جن میں لاکھوں انسان اجل کا نشانہ بن گئے۔

افریقا کے 15 ممالک ایسے ہیں جن کی سرحدیں سمندر سے نہیں ملتیں جس کے باعث تجارت اور مواصلات کے رابطے محدود ہیں۔

آبادی

افریقا کی بیشتر آبادی دیہات میں رہتی ہے لیکن چند بڑے شہر بھی ہیں جن میں قاہرہ قابل ذکر ہے، کی آبادی 65 لاکھ ہے اور یہ براعظم کا سب سے بڑا شہر ہے۔ شمالی اور مشرق کے بیشتر ممالک کا مذہب اسلام ہے اور وہ دنیا کے دیگر اسلامی ممالک کے ساتھ عالمی اسلامی اخوت کے گہرے رشتے میں بندھے ہوئے ہیں۔

رقبہ

رقبے کے لحاظ سے دنیا کا دوسرا سب سے بڑا براعظم ہونے کے باوجود افریقا کی آبادی زیادہ نہیں خصوصاً صحرائی علاقوں میں آبادی نہ ہونے کے برابر ہے۔ زیادہ تر آبادی پانی کے ذخائر اور زرخیز علاقوں میں ہے۔ افریقا میں شرح پیدائش بہت زیادہ ہے اس لیے آبادی میں تیزی سے اضافہ ہو رہا ہے۔

افریقا کی بیشتر عوام کا طرز زندگی انتہائی سادہ ہے لیکن مغربی اشیاء کے استعمال کے رحجان میں اب اضافہ ہو رہا ہے۔ کئی ممالک میں تعلیم عام کرنے کے منصوبہ جات کے تحت خواندگی اور صحت کو بہتر بنانے کی کوشش کی جا رہی ہے۔

نباتات و معدنیات

افریقا معدنیات سے مالا مال ہے اور نو آبادیاتی دور میں اسی دولت نے اسے غلامی کے طویل دور میں دھکیل دیا۔ یہاں پائی جانے والی معدنیات میں تیل، سونا، تانبا اور ہیرا خصوصاً قابل ذکر ہیں جو دنیا میں سب سے زیادہ یہیں سے نکالا جاتا ہے۔ کسی زمانے میں مالی میں دنیا میں پیدا ہونے والے نصف سے زائد سونا نکالا جاتا تھا۔ کئی ممالک میں کان کنی اہم ترین صنعت ہے۔

براعظم کے جنوبی علاقوں خصوصاً جنوبی افریقا میں سب سے زیادہ کانیں ہیں جہاں سے ہیرے، سونا، یورینیم اور تانبا نکالا جاتا ہے۔ تانبے کے سب سے زیادہ ذخائر جمہوریہ کانگو اور زیمبیا میں پائے جاتے ہیں۔ تیل الجزائر، انگولا، مصر، لیبیا اور نائجیریا میں نکلتا ہے۔

افریقا میں مختلف اقسام کے ماحول میں مختلف فصلیں بھی ہوتی ہیں۔ منطقہ حارہ کے علاقوں میں ربڑ اور کیلا اہم کاشت ہے جبکہ مشرقی افریقا چائے اور کافی کی کاشت کے حوالے سے شہرت رکھتا ہے جن میں کینیا قابل ذکر ہے۔

افریقا کی بیشتر صنعتیں خام مال پر عمل پر انحصار کرتی ہیں۔ چند افریقی ممالک کی صنعت ایک ہی فصل یا معدنی وسیلے پر منحصر ہے لیکن کئی شہروں میں مختلف صنعتیں قائم کی جا رہی ہیں۔ شمالی افریقا کے ممالک، نائجیریا اور جنوبی افریقا میں سب سے زیادہ صنعتیں ہیں۔ براعظم میں سب سے زیادہ تیل شمالی افریقا کے مسلم ممالک اور مغرب میں بحر اوقیانوس کے ساتھ ساتھ واقع زیریں ممالک میں نکالا جاتا ہے۔

افریقا دنیا کا گرم ترین براعظم ہے جہاں صحرائے اعظم میں 122 ڈگری فارن ہائٹ تک درجہ حرارت ریکارڈ کیا گیا ہے۔ شمالی ساحلی علاقے انتہائی گرم اور خشک ہیں اور بارش بہت کم ہوتی ہے۔ ساحلی علاقوں سے جنوب کی طرف صحرائے اعظم بیابان اور تیز خشک ہواؤں کا علاقہ ہے۔ اس کے جنوب میں ساحل کا علاقہ واقع ہے جہاں درختوں کی کٹائی صحرائے اعظم کو جنوب کی طرف مزید پھیلنے کا موقع دے رہی ہے۔ خط استوا کے قریب بہت زیادہ بارش ہوتی ہے اور اسی لیے مغربی اور وسطی علاقوں میں گھنے جنگلات ہیں۔ مزید جنوب میں موسم بہت خشک ہے اور قحط سالی سب سے بڑا مسئلہ ہے۔

زمین کے معیار کے مطابق افریقا میں مختلف اقسام کی زراعت ہوتی ہے۔ پہاڑی علاقوں جیسے روانڈا، یوگینڈا اور کینیا میں چائے کاشت کی جاتی ہے۔ شمالی میں جہاں پانی وافر مقدار میں موجود نہیں غذائی اجناس مقامی آبادی کی غذائی ضروریات کو پورا کرنے کے لیے کاشت کی جاتی ہے جبکہ نقد فصلیں جیسے پھل، کھجور اور زیتون برآمد کیے جاتے ہیں۔ مغربی افریقا میں مونگ پھلیاں، کوکوا اور کافی کاشت ہوتی ہے۔ جنوبی حصے میں جنوبی افریقا میں مختلف اقسام کی کاشت ہوئی ہے جن میں پھل برآمد کیے جاتے ہیں اور انگوروں سے شراب کشید کی جاتی ہے۔

خطے اور ملک کا نام مع پرچم	رقبہ (مربع کلو میٹر)	آبادی (بمطابق یکم جولائی 2002ء)	کثافتِ آبادی (فی مربع کلو میٹر)	دار الحکومت
مشرقی افریقا:
برونڈی	27,830	6,373,002	229.0	بجمبورا
جزائر قمر	2,170	614,382	283.1	مورونی
جبوتی	23,000	472,810	20.6	جبوتی
اریٹریا	121,320	4,465,651	36.8	اسمارا
ایتھوپیا	1,127,127	67,673,031	60.0	عدیس ابابا
کینیا	582,650	31,138,735	53.4	نیروبی
مڈغاسکر	587,040	16,473,477	28.1	انتاناناریوو
ملاوی	118,480	10,701,824	90.3	لیلونگوے
موریشیس	2,040	1,200,206	588.3	پورٹ لوئس
مایوٹ (فرانس)	374	170,879	456.9	ماموزو
موزمبیق	801,590	19,607,519	24.5	ماپوٹو
ری یونین (فرانس)	2,512	743,981	296.2	سینٹ ڈینس
روانڈا	26,338	7,398,074	280.9	کیگالی
	455	80,098	176.0	وکٹوریا
صومالیہ	637,657	7,753,310	12.2	موغادیشو
تنزانیہ	945,087	37,187,939	39.3	ڈوڈوما
یوگینڈا	236,040	24,699,073	104.6	کمپالا
زیمبیا	752,614	9,959,037	13.2	لوساکا
زمبابوے	390,580	11,376,676	29.1	ہرارے
وسطی افریقا:
انگولا	1,246,700	10,593,171	8.5	لوانڈا
کیمرون	475,440	16,184,748	34.0	یاؤنڈے
وسطی افریقی جمہوریہ	622,984	3,642,739	5.8	بانگوئی
چاڈ	1,284,000	8,997,237	7.0	این جامینا
جمہوریہ کانگو	342,000	2,958,448	8.7	برازاویل
ڈیموکریٹک جمہوریہ کانگو	2,345,410	55,225,478	23.5	کنشاسا
استوائی گنی	28,051	498,144	17.8	مالابو
گیبون	267,667	1,233,353	4.6	لبریول
ساؤ ٹوم و پرنسپ	1,001	170,372	170.2	ساؤ ٹوم
شمالی افریقا:
الجزائر	2,381,740	32,277,942	13.6	الجزیرہ
مصر	1,001,450	70,712,345	70.6	قاہرہ
لیبیا	1,759,540	5,368,585	3.1	طرابلس
مراکش	446,550	31,167,783	69.8	رباط
سوڈان	2,505,810	37,090,298	14.8	خرطوم
تیونس	163,610	9,815,644	60.0	تیونس
جنوبی افریقا:
بوٹسوانا	600,370	1,591,232	2.7	گیبرون
لیسوتھو	30,355	2,207,954	72.7	ماسیرو
نمیبیا	825,418	1,820,916	2.2	ونڈہوئیک
جنوبی افریقا	1,219,912	43,647,658	35.8	بلوم فاؤنٹین، کیپ ٹاؤن، پریٹوریا
سوازی لینڈ	17,363	1,123,605	64.7	ایم بابانے
مغربی افریقا:
بینن	112,620	6,787,625	60.3	پورٹو نووو
برکینا فاسو	274,200	12,603,185	46.0	اوگادوگو
کیپ ورڈی	4,033	408,760	101.4	پرائیا
آئیوری کوسٹ	322,460	16,804,784	52.1	یاماسوکرو
گیمبیا	11,300	1,455,842	128.8	بانجل
گھانا	239,460	20,244,154	84.5	عکرہ
گنی	245,857	7,775,065	31.6	کوناکری
گنی بساؤ	36,120	1,345,479	37.3	بساؤ
لائبیریا	111,370	3,288,198	29.5	مونروویا
مالی	1,240,000	11,340,480	9.1	بماکو
ماریطانیا	1,030,700	2,828,858	2.7	نواکشوت
نائجر	1,267,000	10,639,744	8.4	نیامی
نائجیریا	923,768	129,934,911	140.7	ابوجا
سینٹ ہلینا (برطانیہ)	410	7,317	17.8	جیمز ٹاؤن
سینی گال	196,190	10,589,571	54.0	ڈاکر
سیرالیون	71,740	5,614,743	78.3	فری ٹاؤن
ٹوگو	56,785	5,285,501	93.1	لوم
کل	30,368,609	843,705,143	27.8

مزید دیکھے

دوسرے براعظم

1. ایشیا،
2. یورپ،
3. افریقا،
4. انٹارکٹیکا،
5. آسٹریلیا،
6. شمالی امریکا اور
7. جنوبی امریکا