مجمع بن جاریہ

مجمع بن جاریہ
معلومات شخصیت

مجمع بن جاریہ صحابی رسول ان کے والد نے مسجد ضرار بنائی تھی

نام ونسب

مجمع نام،قبیلۂ اوس کے خاندان عمروبن عوف سے ہیں سلسلۂ نسب یہ ہے، مجمع بن جاریہ بن عامر بن مجمع بن عطاف بن ضبیعہ بن زید بن مالک بن عوف بن عمرو بن عوف بن مالک بن اوس

اسلام

ہجرت کے وقت کم سن تھے اوراسی زمانہ میں اسلام لائے۔

غزوات

غزوہ حدیبیہ میں شرکت کی۔

وفات

امیر معاویہ کے آخر زمانۂ خلافت میں انتقال کیا۔

اولاد

حسب ذیل اولاد چھوڑی:یعقوب، یحییٰ، عبید اللہ، بیوی کا نام سلمہ بنت ثابت ابن وحدانہ بن نعیم بن غنم بن ایاس تھا اور قبیلہ قضاعہ کے خاندان بلی سے تھیں۔ صاحب طبقات کا بیان ہے کہ ان کی نسل باقی نہیں رہی

فضل وکمال

عہد رسالت میں جن صحابہ نے قرآن جمع کرنا شروع کر دیا تھا ان میں مجمع بن جاریہ انصاری بھی تھے ؛لیکن ایک یا دوسورتیں باقی ہی تھیں کہ آنحضرتﷺ کا وصال ہو گیا، اوروہ اس کام کو مکمل نہ کرسکے۔ مسند ابن حنبل میں ہے:کان احدا لقرآالذین قرؤ القرآنیعنی وہ ان قاریوں میں تھے جنھوں نے قرآن پڑھا تھا، حضرت عمر نے اپنے عہد خلافت میں ان کوقرآن کی تعلیم کے لیے کوفہ بھیجا تھا، عبداللہ بن مسعود بھی وہیں تھے،انھوں نے بھی ان سے قران پڑھا تھا،حدیثیں بہت کم روایت کیں ،صحیح ترمذی میں 3حدیثیں ہیں،جن میں بعض صحیح سند سے ثابت ہیں،راویوں میں یعقوب، عبد الرحمن بن یزید بن جاریہ اورعکرمہ بن سلمہ ہیں۔

اخلاق

زہد و تقدس کی وجہ سے اپنی قوم کے امام تھے اور یہ منصب صغر سنی ہی میں حاصل ہو گیا تھا، باپ نے مسجد ضرار بنائی تھی ،معصوم بیٹا اس میں نماز پڑہتا تھا،لیکن یہ معلوم نہ تھا کہ اس سے آنحضرتﷺ اوراسلام کی بیخ کنی مقصود ہے،آنحضرتﷺ نے اس مسجد کو جلوادیا۔ حضرت عمر کے زمانہ میں لوگوں نے درخواست کی کہ مجمع کو امام بنایا جائے ،بولے یہ کبھی نہ ہوگا ،وہ مسجد ضرار میں منافقین کی امامت کرتا تھا،مجمعؓ کو خبر ہوئی تو قسم کھا کر کہا کہ مجھے منافقین سے کوئی سروکار نہ تھا، جب ان کی طرف سے پورا اطمینان ہو گیا تو حضرت عمر نے ان کو امامت کی اجازت دی۔